2025-09-15 15:20:13

網上熱話｜灣仔站乘客搬雙人床褥入車廂照瘋傳 AI生成定真圖引激辯

港鐵禁止乘客攜帶大型行李，但不時有網民看到有人帶着大型電器、傢俬等物品入站。最新一宗有樓主發文稱，目擊有灣仔站乘客搬雙人床褥進車廂，網民紛直斥誇張，揶揄「遲早運埋棺材」。亦有網民質疑該圖是否用人工智能(AI)生成，引發網上激辯，惟樓主堅稱「張相喺真嘅」。

該港男周日(14日)於Threads發文表示，「今日灣仔站見到奇景，想知有無見過比床褥更大嘅物件？」。照片見到，有人搬了一張雙人床褥進入車廂，路線圖可見是港島綫前往銅鑼灣方向，床褥倚靠扶手佔據不少空間，高度幾近可貼車頂。

樓主強調「張相喺真嘅」玻璃外廣告來自保險公司

由於場面誇張，有網民首先質疑該圖是否由人工智能(AI)生成，樓主回應「張相喺真嘅，唔喺Gen出嚟」，亦有人附和「乜鬼都話AI，你話P圖都仲有可能，AI生成嘅話左右兩邊路線圖一定錯哂」。另有人質疑左方玻璃門外廣告「張相九成九係AI整出來」，但其他網民發現的確是來自一間保險公司於港鐵投放的廣告。

網民：遲早有人用港鐵出殯

網民批評搬床褥者，「搬上搬落都辛苦啦，點解唔call van仔？」、「call架貨van都冇錢，一世俾人睇唔起！」、「點搬入去，咁都俾佢偷雞」、「吓，入到閘？」、「有闊閘機之後，地鐵運輸變得好容易」。有網民就指出，樓主應主動向職員反映，「其實應該搵人按鐘，請職員請返佢落車」。

另有網民諷刺「搬都搬了，唔爭在瞓埋，全躺軟卧」、「遲啲應該會有人用地鐵出殯」、「你以為床褥其實係棺材」、「遲早運埋棺材」、「佢係好彩職員見唔到」、「搬屋、搬廠、搬寫字樓，搵地鐵啦！」、「仲笠住張床單幾愛乾淨」。

港鐵：若見懷疑違規情況應盡快通知職員

港鐵發言人向傳媒表示亦有留意到這張網上的圖片，並十分重視。經向相關車站及港鐵人員查詢，未有處理該事件的記錄，或收到乘客報告有關情況。

發言人指，港鐵一直致力為乘客提供安全、舒適的乘車環境，行李規章對每名乘客攜帶物件的尺寸有規定，目的是不希望對其他乘客造成不便及滋擾。港鐵呼籲乘客為己為人，應遵守相關規定，職員亦會不時巡視，若留意到乘客攜帶不合規章的物件，會要求有關乘客離開港鐵範圍及發出書面警告。如有需要，職員亦會向違規乘客發出擬檢控通知書，並由公司法律部門跟進。若乘客見到有懷疑違規的情況，應盡快通知車站職員，讓職員可即時作出適切跟進。