醫衞局局長盧寵茂(右)同常秘陳松青(左)一齊放緊假。(資料圖片／吳康琦攝)
立法會每年7、8月都會有休會期，政府官員或者會把握唔使點開會嘅空檔放假唞一唞。作為一局之首嘅政策局局長，以及公務員體系入面最高級嘅政策局常任秘書長，一般嚟講都唔會同一時間放假，不過醫務衞生局局長盧寵茂同常任秘書長陳松青，呢排就咁啱齊齊放假。
職務分別由副局副秘署任
根據憲報，盧寵茂係上個禮拜五開始放假，放到月尾31號，即係頭尾放15日，至於陳松青就據講原本就7月頭放到8月頭。依家局長同常秘嘅職務，就分別由副局長范婉雯同副秘書長胡偉文署任。醫衞局回覆Ray話，常秘依家已經改咗放假安排，提早至下個禮拜一返工。
除咗常秘，政府電話簿顯示醫衞局其中一位副秘書長郭善兒嘅職務，依家係由首席助理秘書長朱浩署任緊。睇返資料，郭善兒係最近先加入醫衞局，接替轉咗去公務員事務局嘅麥子濘。
至於暑假放假嘅局長，仲包括依家休緊中嘅勞工及福利局局長孫玉菡、房屋局局長何永賢，兩人頭尾分別放14日同11日假，職務同樣由副局長署理。文化體育及旅遊局局長羅淑佩日前亦都放咗9日假，禮拜二已經復工。
ADVERTISEMENT
【免費暑假親子活動👨👩👧👦送挪亞方舟親子門券及10個遊戲代幣】
