劉文君辦事處請司機，但留錯聯絡電話
立法會議員陳家珮同前議員黃錦輝先後揸車嗰陣觸犯交通規例，有新議員近排請司機，不過就留錯隔離議員辦公室電話，令到對方慘被滋擾。
Facebook「香港私人司機 公司司機 討論 招聘(私家車)」群組噚日出現相關帖文，有匿名帳戶發文話立法會議員辦事處招聘司機，九龍塘攞車，工作時間朝8晚7，每星期工作6日，人工面議。職責包括負責日常接送「老闆」、保持車輛日常清潔。帖文留咗會計界議員吳錦華辦公室電話，不過佢向《am730》表示冇請司機，佢了解過原來係建築、測量、都市規劃及園境界議員劉文君請司機，但係因為一字之差，留錯電話。
劉文君無回覆
吳錦華話有關招聘帖文只係上載短短廿分鐘，佢辦公室已經收到20幾個查詢電話，連佢親戚都問佢係咪請人。帖文之後已經更改咗劉文君辦公室嘅正確電話號碼，劉文君辦事處回覆《am730》查詢，話經內部核實後確認，有關帖文唔係由辦事處授權發布。而係辦事處其中一名職員喺未經授權下，自行以匿名帳戶喺Facebook群組發布招聘資訊，並且因疏忽誤填其他議員辦事處嘅電話。劉文君辦事處對於所造成嘅不便同滋擾致歉，得悉事件後已經即時要求員工刪除帖文。
ADVERTISEMENT
