莊雅婷介紹橋咀島用錯白沙洲配圖　承認「面盲」｜Ray Online

西貢區議員莊雅婷成日拍片介紹政治民生議題，佢最近介紹區內嘅橋咀島升呢做海岸公園，不過畀網民發現用錯白沙洲嘅配圖喎。

形容自己「島盲」

有網民轉發莊雅婷嘅片段，話：「你張相係白沙洲唔係橋咀島啊區議員」，見到片段中用咗大量白沙洲嘅配圖。莊雅婷大方留言致歉，話：「原來我唔單止面盲，仲島盲，下架重來！多謝你話我聽！專業！感激！」莊雅婷向《am730》透露其實佢喺嗰度考潛水牌，潛咗好多次，點知橋咀島同白沙洲實在太似樣，都係認錯咗。佢又話網民果然專業，要集思廣益先得。