大熊貓「加加、得得」雕塑在立法會展出（陳芷晴攝）
今日有兩位「新力軍」加入立法會大家庭，就係大熊貓龍鳳胎「加加、得得」嘅大型雕塑，立法會主席梁君彥相信雕塑會成為立法會訪客嘅人氣打卡點。
梁君彥喺大熊貓雕塑歡迎儀式致辭，多謝中旅集團向立法會送贈呢對獨一無二、人見人愛、別具立法會特色嘅大熊貓雕塑。大熊貓雕塑高1.5米，重近300磅，份量十足。梁君彥仲話雕塑設計有雙重心思，呢對熊貓呈現咗「香港製造」龍鳳胎「加加」、「得得」的招牌黑眼圈。而今屆立法會即將結束任期，議員都忙住審議具爭議嘅法案，唔少議員嘅「熊貓眼」都唔細！
會長期在立法會展出
另一方面，呢對熊貓坐喺立法會招牌圓鼓上面，「家姐」拎住「議事規則」，「細佬」就喺立法會會議廳外嘅「咪兜」接受訪問，梁君彥形容充滿「立法會味道」！大熊貓雕塑由今日起會長期喺地下大堂展出，成為立法會嘅保育旅遊大使，歡迎市民同遊客到訪。
ADVERTISEMENT
送香港迪士尼樂園20周年限定精品及一日門票！
