姜濤及陳卓賢兩位星級「契爸」出席大熊貓活動
海洋公園一對龍鳳胎大熊貓成為「明星」，一舉一動都備受市民關注。海洋公園上個禮拜舉行「家姐細佬後援會成立典禮」，請嚟MIRROR成員姜濤同陳卓賢兩位星級「契爸」出席活動。建制派專欄作家屈穎妍唔滿意活動變成歌迷聚會，形容「國寶淪為明星陪襯品」。
典禮請嚟姜濤同陳卓賢做嘉賓，屈穎妍喺電視台節目評論活動即刻變質，變成歌迷聚會。現場大合照所見，全部出席者舉住姜濤同陳卓賢嘅支持牌，屈穎妍話唔知幾多人係為咗大熊貓而嚟，不過兩隻國寶淪為明星陪襯品就係事實。
指是教育市民「有錢大晒」
根據海洋公園資料，姜濤後援會同陳卓賢歌迷會總共向海洋公園捐出76萬。不過，屈穎妍質疑雖然話係支持大熊貓保育工作，但難免令人聯想到捐錢同明星聚會嘅關連。除咗今次後援會成立典禮，海洋公園舉辦咗龍鳳胎大熊貓「貴賓團」，每人畀1,500蚊就可以喺海洋公園開園前，優先探訪一對龍鳳胎。屈穎妍提醒，國家向香港贈送國寶大熊貓，最主要嘅使命是教育同保育。佢列出單係880蚊後援會入會費，1,500蚊睇熊貓貴賓團，76萬搵國寶做佈景板，反問呢啲舉動教育咗社會同小朋友啲咩，就係「有錢大晒」呢4個字。
【立即參加】送Rollink全球最輕薄可摺疊手提行李箱🧳！
