羅淑佩謙稱細個讀書成績「OK啦、OK啦」。(資料圖片／林俊源攝)
兩年內兩度升官嘅嘅文化體育及旅遊局局長羅淑佩，鏡頭前有一個好「硬淨」嘅形象，佢細個讀書時期原來試過畀好朋友言語欺凌，但當時佢並無受到打擊，「咁算囉你鬧我咪鬧我」，大家畢業之後都有聯絡同見過面，又話自己開學前都會揭一次教科書，睇定未來一年要學啲咩內容。
謙稱兒時讀書成績OK啦
羅淑佩近日接受前助理廣播處長周國豐嘅新音樂節目訪問，講音樂又講往事。讀書時期學生都會喺開學日之前買定晒新書，好心機啲嘅就會包埋包書膠，羅淑佩就話自己更加會由頭揭到尾睇一次，等自己有個概念嚟緊一年要學啲咩，又形容小學啲書其實好容易睇完，「可能(嗰時)無聊啦，不過我係鍾意咁做囉。」被問到細個成績係咪好叻嘅時候，羅淑佩就謙稱「OK啦、OK啦」，所以讀書對佢嚟講唔係好大壓力。
當年羅淑佩都有一班好好嘅同學，但佢話大家相對唔係讀書最叻嗰批，而係比較精靈活潑、體育叻啲咁，正正係咁佢當年就成為畀大家笑、「有啲nerdy(書呆子)」嘅同學。佢記起有一次去校外競技活動，因為自己運動唔掂所以就負責做啦啦隊，但其實佢本身跟咗爸爸學游水，只係冇同大家講。咁啱羅淑佩嗰時就電咗個類似林亞珍嘅冬菇頭，同學又講起游水，結果就以為佢唔識游水而全程嗌「冬菇要去BB池、冬菇要去BB池」。
可幸嘅係羅淑佩話自己當時都算「硬淨」，「咁算囉你鬧我咪鬧我」，仲話呢班好朋友大約20年前都有見過一、兩次，不過依家就真係少喇。諗返起當年經歷，羅淑佩就話「依家我哋鍾意講欺凌，我諗嗰時其實佢哋都有少少欺凌我。」
《好學為福》一句歌詞記到依家
近年不時接受傳媒訪問嘅羅淑佩又話，過往訪問主要都係講政策或者上任感想，所以今次有機會講下音樂都幾好，仲話作為「文化局長」嚟計講音樂都好似好啱key。至於本身點解會聽咁多歌？羅淑佩就話自己係獨生女，細個除咗玩具之外就係靠收音機，所以自細已經聽咗好多音樂節目、有港台陪住佢大。
羅淑佩喺今日播出嘅節目就推介溫拿樂隊嘅《好學為福》，大讚黃霑填詞有加入孔子嘅《論語》，當中「好仁不好學，其蔽也愚」更加係記到依家，入面一句化學歌詞「KIS2係二硫錪化鉀」亦啟發佢去查下咩嚟，結果發現原來係冇呢樣嘢。佢依家嘅工作都包括做中華文化傳承，認為如果有啲多啲類似《好學為福》咁輕鬆嘅風格、形式去傳揚中華文化就好喇。
