警隊四大高層呼籲市民區選投票。(影片截圖)
新一屆區議會選舉下月10日舉行，近日政府高層頻頻出動，呼籲市民在區選當日投票。話說最近警隊「一哥」蕭澤頤，就聯同三位「二哥」，包括周一鳴、陳俊燊同簡啟恩，就拍咗條片，呼籲市民區選投票。
片入面，塗上剃髮膏、貌似聖誕老人嘅周sir就問簡sir漂唔漂頭好，簡sir就話漂頭好傷，而頭髮烏黑嘅陳sir就撒手兼拎頭。正當周sir猶豫不決之時，蕭sir突然殺出金句「頭可以唔漂，票就一定要投」。食字食得咁㜺鬼，唔知度咗幾耐呢？
話時話，陳sir頭髮咁烏黑亮澤，應該「恨」死唔少正歷「中年危機」嘅男士，唔知陳sir可唔可以分享下頭髮保養嘅秘訣畀一眾男士呢？
