【洋蔥】超催淚書法「給我吃魚生」

最近，日本有一幅書法作品「給我吃魚生」引起網上熱議，因為聽上去好幼稚，但睇埋作品簡介先發現呢幾個字背後有個令人鼻酸嘅故事。

呢幅書法出自10歲小朋友野口晴輝之手，佢因為患病而無得食魚生，非常鍾意食魚生嘅佢會一直追問醫生「今日食唔食得魚生？」無奈直到佢離世之前，都無法實現呢個對普通人來講簡單不過嘅願望。

佢媽媽就話：「兒子因為生病關係唔可以食生嘢，鍾意食魚生同壽司嘅佢每日都忍得好辛苦，仲喺醫院練習書法時寫低呢句話掛喺牆上，每日醫生嚟巡房都會問醫生：今日可以食自己想食嘅嘢未？如今佢喺另一個世界應該不使再忍口，希望佢喺另一個世界過得開心。」