2025-07-25 17:30:34

動漫節2025｜首日直擊會場限定優惠　POCO手機、Xbox主機及手機周邊折扣（多圖）

香港動漫電玩節2025除了有模型玩具，亦有電競手機、遊戲主機及配件、電腦周邊等產品可以入手，首天開鑼行一轉都有不少好物推介，有興趣可以睇定心水產品再出擊！

POCO手機特價

POCO展位位於F24-25，現場可以體驗一系列POCO手機及Xiaomi電腦產品如喇叭、顯示器等，亦有會場限定優惠。POCO X7 Pro只要$1999起，POCO F7 Pro減$500，只需$2899起，而POCO F7 Ultra減$400只需$4099起，再送《重返未來：1999》限定手機殼。指定時段超能少女亦會到現場，大派POCO限定周邊。

同場更有熱門手遊《重返未來：1999》體驗區，其中將有多款會場限定遊戲周邊，玩家可完成任務後領取，完成小遊戲挑戰更有機會贏POCO F7 Ultra旗艦手機。

動漫節2025｜ASUS ROG攤位展出旗艦電競手機ASUS ROG Phone 9。

ASUS電競周邊

另一主打電競的ASUS ROG都有擺檔，位於F27-28及F30-31，除了可體驗ROG Phone 9，更有一系列電競產品，包括TUF Gaming聯乘初音系列鍵盤、滑鼠及耳機，以搶先價發售；多款電競鍵盤等配件都有會場優惠價，包括最新的HARPE ACE EXTREME超輕量三模碳纖維電競滑鼠。

動漫聯乘配件

Xpower攤位位於B16-18，有聯乘11大動漫的手機周邊，包括罐頭豬LuLu、咒術迴戰、海賊王、新世紀福音戰士、Sanrio、Marvel、大麻成＆阿婆等，有齊各種尿袋、旅行充電轉插、磁吸無線充電座、充電器、電容觸控筆、智能定位器、風扇仔甚至肌肉槍都有，全部有會場優惠價，最平由$70起。

另一品牌Verbatim的攤位在D22-24，推出大熱的底褲兔OPANCHU USAGI及mofusand產品，包括多款設計的尿袋、旅遊轉插等，造型可愛。

動漫工房（D22攤位）有齊最近大熱的玩具相機及半格菲林相機， Escura InstantSnap有兩款會場限定版，分別是蠟筆小新及Care Bears設計，更設獨有的相框，價錢同樣是$399。可愛的retro-1迷你即影即有造型相機，動漫版售價$299。

Xbox主機優惠

Xbox攤位於動漫節D15，現場限定優惠包括Xbox Series S主機會場優惠價$2099、Xbox Series X主機會場優惠價$3599，3個月Game Pass Ultimate會場優惠價$278，精選手掣、耳機及配件同樣有超值優惠，同場還有遊戲試玩。

手機周邊特價發售

csl攤位（D14-15, E02）則有HONOR手機、大量不同品牌如Nothing、HUAWEI的智能穿戴產品及電腦周邊等特價發售，精選產品低至1折，相當抵買，最新的Switch 2主機及周邊亦有少量折扣。

多款遊戲試玩

掃貨以外，會場內亦有多款未推出的遊戲免費試玩，例如BANDAI NAMCO有《數碼寶貝物語時空異客》、《超級機器人大戰Y》、《全民高爾夫環球之旅》、《小小夢魘3》；PlayStation區有《鬼滅之刃火之神血風譚2》、《明末：淵虛之羽》等。會場內還有電玩手遊世界及香港原創遊戲展區，可以親身試玩多款特色遊戲。