唔少歌手都係參加歌唱比賽出身，而佢地多數都參加過各類型比賽賺經驗。有網民就喺討論區開post，分享多位歌手藝人入行前嘅比賽片段。
咁多條片之中，最搶鏡嘅可能係Mirror成員AK江㷸生，因為片段來自一個10年前舉行嘅卡拉OK比賽，但係當年20歲嘅AK個樣同而家近乎冇分別！至於同一個比賽嘅參加者仲有參加《全民造星3》彈起嘅陳葦璇（當年叫陳嘉茵）；毛記電視女主播、毛記創辦人阿Bu太太利君牙（原名陳柏寧）……同埋網路紅人劉馬車。
炎明熹4年前未剪齊蔭
而憑TVB《聲夢傳奇》入行嘅炎明熹Gigi，亦有人將佢2019年參加嘅歌唱比賽片段開心share。當年只得14歲嘅炎明熹仲未以齊蔭look示人，演唱G.E.M嘅《紅薔薇白玫瑰》已經展現驚人唱功。
林家謙中學已自彈自唱
至於近年快速冒起嘅林家謙，2008年仲係中六學生嘅時候，參加校內歌唱比賽已經自彈自唱，仲憑演唱周杰倫《安靜》奪得冠軍。之後佢喺學校聖誕活動上成為表演嘉賓，一早就係萬人迷。
原文刊登於 Yahoo 娛樂圈