娛樂
2022-07-14 17:05:30

林家謙個唱開售 歌迷打爆server 重現MIRROR演唱會有飛買唔到慘況

分享:

林家謙個唱開售 歌迷打爆server 重現MIRROR演唱會有飛買唔到慘況

做歌迷,買張演唱會飛絕對係對歌手喜愛程度大考驗。繼早前MIRROR演唱會開售,fans撳足一日都買唔到飛嘅慘況之後,今日開售嘅林家謙演唱會都出現相同情況。

首次開紅館個唱嘅林家謙,將會喺8月中舉行6場紅館演唱會,並於今日公開售票,一共有19000張飛發售。唔少歌迷一早準備好,但係同上次買MIRROR飛一樣,連入售票網網站都唔得。由於網路大塞車,歌迷根本買唔到飛,截至11點只係賣出一半約9300張。

早前MIRROR演唱會都因為買飛者眾多,結果要用半日時間系統先可以將全部12場演唱會嘅飛賣晒。有歌迷認為售票網系統多次不勝負荷,鬧爆話「不如執_咗佢」。

林家謙個唱早前座位表曝光之後,網友都認為又係一張絕望座位表,因為扣除贊助商門票以外,全場其他座位近乎被唔同單位mark定唔少飛,令座位表漆黑一片。

林家謙個唱開售 歌迷打爆server 重現MIRROR演唱會有飛買唔到慘況

林家謙

原文刊登於 Yahoo娛樂LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受