娛樂
2022-09-28 16:11:38

錢慧儀離婚 | 1981年港姐是非多 為件泳衣篤灰 冠軍因虛報年齡被DQ

分享:

1981年港姐亞軍錢慧儀離婚成為新聞,適值今屆港姐剛剛舉行完決賽。翻查資料,原來錢慧儀嗰屆港姐搞出相當多風風雨雨,今屆傳出張光怡同許子萱當眾嗌交嘅傳聞,對比之下真係濕濕碎。

當年只有17歲嘅錢慧儀,因為拍過快餐店廣告而成為大熱門。另一位熱門就係參加過美國華埠選美、專程返港參選嘅羅佩芝,據聞佢係截止前15分鐘先交表。

羅佩芝「篤灰」錢慧儀

錢慧儀同羅佩芝成為嗰屆港姐2大熱門,亦係新聞人物。先有傳錢慧儀態度甚為「霸氣」,然後再有周刊揭發,有佳麗打去報館踢爆錢慧儀受TVB「關照」,本來泳裝環節抽中著黑色,但係神奇地換到搶眼嘅桃紅色。據知,羅佩芝約咗5位佳麗傾偈,八到呢單料之後,有人建議不如打去報館「篤灰」。而新聞見報後,錢慧儀又著返黑色泳衣。

決賽當晚,頂頭大熱錢慧儀得到季軍,被指不滿賽果而黑面之外,更想放棄名銜,但被錢父掌摑阻止。而羅佩芝就以次熱人選贏得冠軍,當屆亞軍係勞錦嫦。

▼中間係冠軍勞錦嫦,(左二)亞軍錢慧儀及(右二)季軍狄寶娜摩亞

執位後嘅1981年港姐,中間係冠軍勞錦嫦,(左二)亞軍錢慧儀及(右二)季軍狄寶娜摩亞

各自對傳媒單打

比賽完咗,是非仲未完。據當時報導,錢慧儀同羅佩芝各自對傳媒單打對方,成為茶餘飯後話題。後來更大鑊嘅係,有周刊收到美國讀者來信,指羅佩芝參加港姐前喺美國選美時已報稱23歲,同參加港姐時申報嘅22歲有出入。周刊更以「越活越年輕」為封面標題,極之哄動。

年齡以外,TVB亦向羅佩芝發律師信,要求佢解釋學歷。最終TVB決定禠奪羅佩芝后冠,該屆冠軍由勞錦嫦頂上,錢慧儀成為亞軍,季軍就由獲得「青春小姐」嘅混血佳麗狄寶娜摩亞補上。

虛報年齡被DQ嘅羅佩芝2007年受訪片段畫面

羅佩芝「虛報」年齡

羅佩芝解釋,自己係1955年出生,參選時已經超過港姐25歲芳齡上限,但香港出世紙就寫咗1958年,佢冇深究之下就填咗個錯嘅年份。多年後羅佩芝再提到「虛報」事件,原來多年前移民美國時,羅佩芝媽媽被官員盤問9個仔女嘅生日,以證明全部係親生,羅媽媽講錯咗羅佩芝出生日期,令佢嘅美國證件亦跟住錯。

被DQ嘅羅佩芝一度重返TVB拍劇兼做過歌手,不過好快就返美國,開咗間美容院,又參與義工活動同教中文,歸於平淡。而錢慧儀就成為名媛,至於榮升冠軍嘅勞錦嫦,保持當年參選低調冇是非嘅作風,即使後來嫁俾「大班」鄭經翰,都甚少露面。

原文刊登於 Yahoo娛樂LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受