娛樂
2022-08-23 16:53:05

白色強人II|譚永浩眼神笑容勁恐怖 無差別斬傷途人 睇到網民心都寒

分享:

《白色強人II》譚永浩

TVB劇集《白色強人II》正在熱播中,劇集陣容鼎盛,除咗有五大視帝視后及實力派演員之外,其他配角同樣非常搶鏡,劇中演員嘅表現均被大讚,當中包括飾演精神病人李曉嘅譚永浩(Jarryd),噚晚(22日)嗰集佢喺行人隧道用刀無差別斬傷途人,更傷及Yan(張曦雯飾),其眼神及笑容相當恐怖,睇到觀眾心都寒埋呀!。

喺噚晚嗰集,劇情除咗繼續集中喺YT(郭晉安飾)及葉晴(胡定欣飾)草案紛爭之外,譚永浩飾演嘅精神病人李曉原本好安靜咁坐喺行人隧道睇書,不過就被保安多次勸喻離開,期間仲有話佢「喂,你煩唔煩呀?你係咪有病呀?」,受到刺激嘅佢一秒變臉,並喺袋度拎出生果刀,無差別咁斬傷途人,更傷及Yan及差啲連葉晴都被佢所傷,好彩及時有人阻止並將佢制服。

網民大讚演技

而譚永浩亦有喺社交網站出PO,寫上:「第一次演呢種心理有問題嘅角色。 李曉嘅事件,係真人真事改編。 導演對我嘅演繹調教得相當仔細,每一個眼神,每一個笑容。亦有叫我加少少Joker嘅元素落去。我哋有再三睇playback,直到我哋都覺得係鏡頭面前呈現到果份恐懼感。 我好多謝導演嘅信任,俾好大空間我去發揮,又係適當嘅時候拉返住我。 多謝監製俾我去演繹李曉。」譚永浩喺播出嘅短短幾分鐘,由起初若無其事,去到眼神笑容突然變得恐怖,唔少網民都話佢拿捏得好好,睇到心都寒埋,留言話:「做得真係好好」、「演得好,眼神令人心寒」、「加油,演得好出色」、「岩岩睇到電視 您演技真係大踴躍 加油啊」及「​​我當時在現場都感受到你演技,帶動了整個逼真場面,非常讚嘆,期待再看你更多演出。」等等。

現年34歲嘅譚永浩,喺中學時期就被星探發掘,2004年參與《赤沙印記@四葉草.2》拍攝,2010年參加《英皇新秀歌唱大賽》,並奪得「金咪大獎」和「最受歡迎網上人氣獎」,去到2012年報讀TVB第26期藝員訓練班,翌年便正式加入無綫。多年嚟Jarryd參與唔少劇集及綜藝節目拍攝,例如《愛·回家》、《是咁的,法官閣下》、《張保仔》、《激優一族》、《Y Angle》及《流行都市》等等,不過可惜事業都係發展平平,入行初期更試過戶口淨返38蚊。雖然演藝事業過程唔係一帆風順,不過佢熱愛演戲,再加上得到家人嘅支持,所以佢繼續堅持落去,並好希望可以盡快有能力去擔起頭家,令媽媽可以唔使工作,好好休息。

同杜以辰感情穩定

至於感情方面,譚永浩喺2019年因音樂劇《我們的青春日誌》,並與網絡女神杜以辰認識及相戀,現時二人感情穩定,仲不時喺社交網站上載甜蜜合照放閃,真係羨煞旁人呀!

《白色強人II》譚永浩

《白色強人II》截圖

《白色強人II》截圖

《白色強人II》截圖

《白色強人II》截圖

《白色強人II》截圖

《白色強人II》截圖

《白色強人II》截圖

《白色強人II》截圖

 

譚永浩

 

譚永浩 & 杜以辰

譚永浩 & 杜以辰

譚永浩IG

譚永浩 & 杜以辰

原文刊登於 Yahoo娛樂LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受