娛樂
2022-05-26 14:00:00

電影|IU做媽媽 日本導演是枝裕和拍韓片《孩子轉運站》 棄嬰收集箱引發的人情故事

分享:

康城影展已經展開,日本導演是枝裕和憑韓國電影《孩子轉運站》(Broker)入圍……日本導演拍韓片?係!

話說2015年釜山影展,是枝裕和同韓國演員宋康昊碰面,傾到不如拍部韓片。導演之後寫咗個大綱,以棄嬰為主軸,再牽繫到幾個人嘅故事。「孩子轉運站」其實係韓國同唔少國家都有嘅「棄嬰保護箱」,作用係俾無法撫養初生BB嘅父母,將BB放入去有保護功能同感應器嘅裝置,等有關方面知道有BB喺入面,立即前去接收,再安排佢地由福利機構接管。

孩子轉運站

導演為咗呢個設定,接觸過BB時真係曾經喺呢個箱被遺棄嘅人,佢地長大後都會問自己嘅存在係咪好事。呢種諗法令是枝裕和更加決心要拍好呢套戲。

電影中,IU飾演嘅素英放低初生兒子宇成,喺負責管理嬰兒保護艙嘅東秀(姜棟元飾)同稱兄道弟嘅洗衣店老闆相鉉(宋康昊飾),居然私自將宇成帶走。素英第二日折返搵仔,東秀同相鉉向佢解釋,想為宇成搵處好人家先將佢帶走。素英決定同東秀、相鉉一齊為宇成搵新家庭而踏上旅程。而知道事件嘅女警(裴斗娜飾)同下屬李刑警(李周映飾)決定跟蹤佢地幾個……

孩子轉運站

演員卡士相當強,剩係宋康昊裴斗娜已經夠照,仲要有首次演媽咪角色嘅IU。導演是枝裕和話,因為疫情冇嘢做,喺屋企煲劇期間睇咗IU嘅舊作《我的大叔》,立即成為IU fans!就係咁,導演決定搵IU演素英,仲話個角色非佢莫屬。

睇預告片都感受到是枝裕和電影向來都有嘅淡然生活感,亦同喺康城得獎嘅《小偷家族》有所呼應。兩套戲入面嘅家庭,都唔一定有血緣關係,但係可以比親人更親。《孩子轉運站》6月下旬將會喺香港上映。

原文刊登於Yahoo電影LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受