娛樂
2022-08-15 16:41:00

《功夫熊貓》第4集落實 2024年3月阿寶返嚟啦

分享:

功夫熊貓

荷里活有題材荒N年,大片繼續係續集、翻拍或者改編故事,炒冷飯?最緊要有人buy,你估炒得好食容易架?

動畫創作室夢工場(Dreamworks)宣佈,旗下得意之作《功夫熊貓》嘅第4集,將會喺2024年3月8日上映。對上一套《功夫熊貓》已經係2016年上映,而第一集更加係2008年嘅戲。《功》系列以肥騰騰熊貓阿寶拜師學藝習武旅程為故事主軸,每集都有唔同歷險,十幾年前以中華文化crossover西洋動畫撞出新鮮感,《功夫熊貓》全球收6億3千萬,成個系列一共收18億。

近年夢工場偶有佳作,《古魯家族2:霸器新時代》喺前年疫情高峰期推出,照收2億多啲,今年嘅《壞蛋聯盟》都有近2億5千萬。不過論知名度《功夫熊貓》犀利好多,電影衍生出來嘅電玩、主題樂園景點又賺多一筆,而Netflix上個月亦推出《功夫熊貓》劇集The Dragon Knight。隔咗8年,睇過前三集嘅細唔都大個嘞,係時候向新一代豆釘「落手」!而且功夫+熊貓呢個題材,都有機會得到中國當局批准上畫,係就發。

但係官方消息暫時只係得個映期,一向為美國版阿寶配音嘅Jack Black,仲有德斯汀荷夫曼、Angelina Jolie、Seth Rogen同埋華裔嘅成龍及劉玉玲,會唔會再次獻聲?未公布!不過The Dragon Knight都搵得返Jack Black配音,相信成事機會好大。

夢工場手上仲有另一張王牌︰《史力加》!只聞樓梯響嘅第5集真係「三年之後又三年」,好在衍生出來嘅《無敵貓劍俠2》今年聖誕有得睇,相信《無》嘅成績會係《史力加》第5集去馬與否嘅關鍵。

 

原文刊登於 Yahoo娛樂LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受