Ad Block Ad Block
娛樂
2022-11-21 15:56:18

法證先鋒V | 蔡潔成A貨李佳芯上位 曾全裸肉搏曾志偉 忽然玩失蹤飛王宗堯

分享:

加入大台幾年嘅蔡潔,連續2年有份演台慶劇,今年就喺《法證先鋒V》演法醫科醫生。而去年《拳王》出街時,大台嘅SEE SEE TVB facebook專頁整咗張惡搞圖考眼力,叫網友分辨蔡潔同李佳芯。甚至連「蟲草大王」陳恩德出席嘅活動,TVB都搵蔡潔代替缺席嘅Ali,擺明當代替品咁用!

咁快已經為重頭劇孭飛,睇返過去嘅新聞,33歲嘅蔡潔肯搏又識睇風勢,比起等運到嘅姐仔更有鬥心。要紅,就係要有呢啲特質架啦!

曾與曾志偉拍全裸肉搏戲

喺內地成長嘅蔡潔,就讀廣州暨南大學導演系,係《還珠格格》「皇阿瑪」張鐵林嘅愛徒。2012年蔡潔喺澳洲讀碩士嗰陣參加墨爾本華裔小姐,一口氣拎咗7個大獎,破晒大會紀錄。2013年佢再代表墨爾本參加TVB國際中華小姐,並贏得最受傳媒歡迎佳麗獎。

選完華姐之後蔡潔返澳洲完成學業,畢業後被導演彭浩翔相中,演出電影《香港仔》,飾演曾志偉外遇對象「護士仔」,戲中同曾志偉有全裸肉搏戲份,意識大膽,並憑該片獲提名第34屆香港電影金像獎最佳新演員。蔡潔之後加盟黃柏高旗下嘅太陽娛樂文化,不過未見有突出之作,到2018年「轉會」,由王晶嘅星王朝同邵氏共同管理,算係4分1個TVB親生女,拍過《飛虎之雷霆極戰》演電腦專家,同吳卓羲有感情線。至於拍咗未播嘅TVB劇仲有《一舞傾情》、《香港人在北京》及《廉政狙擊》。

王宗堯睇新聞先知被分手

入行多年,蔡潔最為人記得嘅可能係同王宗堯拍過拖。2016年7月王宗堯同蔡潔撻著,仲帶女友去周家怡生日飯局,點知半年後蔡潔向傳媒表示,因為工作關係少見面,決定同王宗堯分手。半年後,王宗堯上杜汶澤嘅節目做嘉賓,自爆原來蔡潔有段時間忽然玩失蹤,王要睇新聞先知被分手。阿澤喺節目度亦都爆料,話試過搵蔡潔拍戲,蔡仲表現得好欣賞阿澤,點知開鏡前4日,蔡潔以「驚影響內地市場」為由辭演,暗示係同阿澤嘅政見有關。至於同王宗堯分手又係咪呢個原因?怕且要問蔡潔先知嘞。

Ad Block

原文刊登於 Yahoo娛樂LOL,am730獲授權轉載

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受