TVB同內地合作嘅音樂綜藝節目《聲生不息》，算係近期中港兩地稍有話題性嘅節目。由於《聲》唔似其他同類節目咁會淘汰歌手，點樣令演出保持新鮮感係收視關鍵。
有傳節目正在安排4位歌手以「補位」身份上場，分別係男女兩隊各增2位。網上流傳女歌手隊會加入容祖兒同谷婭㵟，男歌手就有周柏豪及內地男團TFBOYS成員王源。
容祖兒開拓國語歌市場多年，年前終於憑《歌手》節目突圍，而家喺內地發展唔錯，早前參與《乘風破浪的姐姐》人氣更上一層樓。容祖兒同TVB關係唔錯，更加係十屆《勁歌金曲頒獎典禮》最受歡迎女歌星得主，有份參與《聲生不息》毫不意外。有傳祖兒本身就係《聲》先發歌手陣容之一，只係檔期問題令佢未能加入。
至於周柏豪同谷婭㵟都係TVB旗下星夢娛樂歌手，谷婭㵟更加係喺內地出生成長。更妙嘅係，眼利網友發現周柏豪同谷婭㵟微博上列出嘅IP位置，前者喺廣東，谷婭㵟更加係身在節目錄影地點湖南！另外周柏豪微博更被發現追蹤咗多位參加《聲生不息》嘅歌手帳戶，例如炎明熹、曾比特、毛不易等，似乎係同節目有關。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
This article originally appeared on Yahoo 娛樂圈 at https://hk.news.yahoo.com/%E8%81%B2%E7%94%9F%E4%B8%8D%E6%81%AF%EF%B8%B3%E5%82%B3%E5%AE%B9%E7%A5%96%E5%85%92%E5%91%A8%E6%9F%8F%E8%B1%AA%E8%B0%B7%E5%A9%AD%E3%B5%9F%E5%8A%A0%E5%85%A5-%E7%B6%B2%E6%B0%91%E9%9D%A0%E5%91%A2%E6%A8%A3%E8%B3%87%E6%96%99%E6%90%B5%E7%B7%9A%E7%B4%A2%EF%BC%9F-072723852.html