肥媽今早感到頭痛，於是做快測呈陽性。
肥媽（Maria Cordero ）今日在社交網貼出短片，表示自己中招確診新冠肺炎。已接種第四針疫苗的肥媽，片中見她面色蒼白，聲音沙啞，她表示昨日 （23日）做快測時依然無事，今早感到頭痛卻出現「兩條線」呈陽性：「我已經係個好小心嘅人，由第一波到依家終於都係中咗，我日日都有check噚日都無事，之後去行山再去街市，食埋飯去買衫就返屋企。今朝有啲頭痛就再驗，我每日都有快測，今朝就見到兩條線，之後個頭越來越痛，未發燒但個人作發燒咁，已通知政府，依家留喺房度隔離，又戴住口罩同開咗啲殺菌機。」
正在房間自我隔離的肥媽，表示已叫家人及外傭這星期不要出街，同時她亦宣布原定明天及下周三 （29日）做的網上直播均要取消，希望粉絲原諒。向來事事小心的肥媽苦惱不知自己從何感染，她謂：「真係諗唔到，係去餐廳洗手間，但我都有戴口罩。」最後再叮囑大家要小心：「大家真係要小心，唔好以為自己大隻，最緊要小心呀。」
肥媽早在四月已接種第四針科興疫苗。