魏浚笙不介意執Edan二攤，事前更致電對方。
魏浚笙(Jeffrey)今日到中環出席活動，他透露近日忙於拍攝ViuTV新劇《百萬同居計劃》，對於他的角色原屬意MIRROR成員呂爵安(Edan)，他表示不介意執二攤，「因為Edan冇期，由面試到試造型都好急，連埋拍都係兩個星期，都好感恩。」
Jeffrey指因擔心會影響二人感情，所以事前曾找Edan傾談。他說︰「都有問佢意見，都驚影響大家感情，我比較在意佢感受，因《膠戰》係一個family，唔想為呢件事而令大家感受唔好。我話你介唔介意，你介意我就唔做，你唔介意我先接。」他更透露，Edan當時著他不要想太多，反而應該把握機會，大讚對方是個很窩心的哥哥。
提到MIRROR演唱會，Jeffrey表示Edan在群組內表示會盡量留飛給他們，他又坦言身邊的親友都託他買飛，「我阿爸都有問我，我叫佢自己撳飛啦！」
Edan與Jeffrey非常友好。