Ian貼靚仔想派福利。
人氣男團MIRROR正為下月的紅演唱會積極綵排，而成員陳卓賢（Ian）昨日（30日）便在社交網派福利，他貼了兩張在草地上的靚仔相，並寫上他的歌曲《留一天與你喘息》其中一句歌詞：「平靜裡安躺」。
照片吸引不少Hellosss（粉絲暱稱）留言讚好，而向來搞笑的張敬軒就以「阿媽mode 」鬼馬留言表示：「阿媽mode #阿仔個地下濕唔濕㗎會唔會整污糟件衫㗎」，而Ian亦相當識趣，以軒仔歌詞作回應，他寫道：「會呀！整到 #越來越冷越來越濕越來越黑，但無辦法，要瞓低先可以望到 #我的天。」二人大玩歌詞兼食字，網民都紛紛留言表示：「靚Tag 」。軒仔之後仍繼續回應Ian，又大讚：「陳仔真係叻，一睇就知好俾心機讀書….」還指不僅是「望子成龍」，軒仔認為應該是「望子成Ian」！
