Ivy周曉彤親認翻撻周永恆兩星期稱曾被叉頸恐嚇轉頭甜蜜復合 (有圖)

周永恆（Roy）與內地太太陳薇婚姻觸礁，陳薇已委托律師處理緊離婚程序，程序進行接近一年，消息曝光同時卻爆出男方跟前女團MVG成員周曉彤（Ivy）發展地下情，雙方日前才掀起隔空罵戰，Ivy在社交平台數臭Roy是大話精兼有精神問題，並在本月4日出席公開活動時，自言只是「象徵式」鍾意Roy，強調兩人只拍了一日拖，又大爆對方用兒子來作情緒勒索，做出不同的滋擾行為，包括屋企門口發癲、不停按門鐘和call消防等，甚至被叉頸恐嚇。

退出娛樂圈望平靜生活

今日傳出Ivy與周永恆已戲劇性復合，《am730》記者今日透過WhatsApp以短訊查問兩人是否復合，Ivy回覆：「是的」，並附上兩個合十emoji。追問下，她再回：「我想澄清少少嘢。首先我要好多謝嗰個網民嗰張相，就係因為嗰張相先至引發咗呢一場風波，由頭到尾我冇講過大話，我講嘅所有嘢都係事實，一直以嚟我哋之間存在住好多個誤會，事件曝光之後令到我所有嘅問號都得到咗答案，而佢所指我嘅情慾短訊，都係因為當下佢爸爸過咗身，佢cap嗰堆字上面係通話，我同佢講完個電話後出於安撫，最後大家有共識咗，復合大約兩個星期了，我早已退出娛樂圈，希望可以平靜咁繼續生活。」Ivy亦向記者提供與周永恆的最新sweet爆合照。

日前在活動上，Ivy自爆曾遭周永恆叉頸威脅其人生安全，更恐嚇一出聲「會即刻殺死你」，擔心再被對方騷擾已換手機號碼。Roy則於網上反擊，公開二人情慾短訊，直斥對方求愛不遂及因愛成恨，雙方關係惡劣，再見不是朋友。周永恆（Roy）多年來負面新聞多多，2017年與趙頌茹離婚時被爆出軌及家暴，當時網民封他為「世紀賤男」；2018年，他與內地妻子陳薇奉子成婚，育有一子，至2023年二人再爆出家暴事件並鬧上法庭，之後亦離婚收場。