張耀揚、鄭浩南及尹揚明多位「大佬」到場了解AI。（林俊源攝）
張耀揚昨日（20日）出席AI電影《逆天行．悟空》發布會，同場還有鄭浩南、尹揚明、朱永棠等，頓時變了《古惑仔》Re-U。「烏鴉」久未在港露面，談到會否被AI取代，他表示不清楚，自己未接觸過AI，但相信不能取替到人的情感，如出現「AI張耀揚」可以令他讚錢，也很過癮。
提到當年他拍《古惑仔3之隻手遮天》，他為打爛關公神像這場戲要劇組軟硬兼施，要給他6萬6元大利是才肯拍，甚至傳他為此要茹素三個月再花十萬打造另一個關公像。他表示從沒收過大利是，「有各大傳媒有自己唔同嘅講法，我本身食咗7年齋，唔係因為關公，而係因為鍾意食齋嗰個感覺，對身體嗰個反應而食齋嘅。（收大利是？）製片比我？冇喎，一封利是都冇喎。我無話唔肯拍，做演員係需要配合導演或者監製佢所需要嘅嘢，當然唔係話拍啲唔好嘅嘢啦。我覺得做演員係應該係知道自己嘅崗位做啲乜嘢。」
問到拍完有沒有遇到怪事，他表示沒有，之後繼續拍第四、五、六集，更笑謂「我咁陽光，撞邪呢樣唔喺我身上。」他表示自己百無禁忌，再演也沒問題，自己仍有戲癮，坦言已有十幾年沒跟香港觀眾見面，自己看到一些電影時，也會幻想一下如自己有份演出會怎樣。
張耀揚表示仍有戲癮。（林俊源攝）