黎明演唱會｜歌手夢始於黎爸爸贈walkman 尾場完騷10分鐘火速走人(有片)

黎明於紅館舉行一連10場的《黎明 LEON LAI ROBBABA 紅館演唱會 2026》，昨晚(31日)舉行尾場，容祖兒(Joey)、蔡卓妍（阿Sa)、彭秀慧(Kearen)、何嘉莉及雲浩影等圈中人捧場。Joey、阿Sa甫坐低便雀躍地研究紅蘿蔔手燈開關。演唱會於8時20分開始，唱到第二首歌《貪新愛舊》時，3人站起身隨節拍揮動紅蘿蔔手燈，全程十分投入。演唱會於10月20分結束，來到尾場，黎天王貫徹不encore宗旨，完騷後歸心似箭，於10時33分左右，已從紅館乘座駕離開，並向散去的人群揮手，一度引來歡呼聲。

罕跳disco舞步

黎明(Leon)繼續唱盡經典金曲，當唱《但願不止是朋友》和《Ellie》時，舞蹈總監梁業(Fatboy@ERROR)化身木偶登場，可愛造型非常搶鏡。黎明唱《夏日傾情》和《傻癡癡》時，更走近台邊跟fans揮手派福利。當招牌快歌《眼睛想旅行》、《Sugar In The Marmalade》時，向來站著唱的Leon激罕大曬disco舞步，全場氣氛高漲。

英國留學靠walkman穿梭墳墓

演唱會尾聲，當唱畢《七十二變》後，黎明分享與音樂結緣的故事，原來全因一部walkman，「我十幾歲時，香港好興Walkman，就叫爸爸買俾我，爸爸就話要我考好成績作獎勵，結果我考到，佢就買咗部walkman俾我，仲俾錢我買咗盒Cassette帶，嗰時電台成日播一首歌，聽得多就好鍾意，帶咗一盒帶，嗰要返學要行十幾二十分鐘，就帶住walkman不斷播首歌，身邊嘅巴士、小巴、的士聲，全部聽唔到，沉醉於自己嘅歌曲世界，好開心。」然後就開始揀自己喜歡的歌聽，Leon更自爆當年冇錢買黑膠碟，就用Cassette帶錄歌聽，「我就俾錢，錄喺自己盒帶聽。後來去英國讀書，買咗另一盒Cassette帶聽，因為當時英國好早天黑，我要行經墳場，如果走外圍要9個字(45分鐘)，但行捷徑穿梭墳幕就20分鐘，我就戴住耳機聽walkman，就好靜，呢個係我點解鍾意做音樂嘅原因，就係因為一部walkman，和一首歌曲。」至於這是甚麼歌，當時Leon就大賣關子，直至完場就播出經典金曲《I Love You More Than I Can Say》，背幕就播放影片，一位學生在香港街道聽walkman，其間有不少香港特色的招牌、地道小食包括巨型魚蛋、蝦餃、燒賣等，非常有心。

提醒歌迷食維生素

Leon唱出最後兩首歌《我的親愛》穿插《特別的歌給特別的你》時，走到兩旁與fans握手，不忘送上祝福和叮囑，「肉麻嘅說話我就唔講，祝大家身體健康，Good Luck，我知好多朋友聽日(今日)仲要返工，遇到任何問題，開心面對，就嚟夏天落雨，回南天，望住個紅蘿蔔，提醒自己食維生素！」以祝福為演唱會畫圓滿句號。