周志康今日（12日）出席《中年好聲音4》24 強見面會，他接受訪問表示非常開心粉絲到場支持。提到參與《中年好聲音4》錄製的前期要兼顧拍攝劇集《璀璨之城》，他說：「其實當初知道有可能會參加呢個比賽嘅時候，有兩套劇話會拍，我好似分唔到時間去做呢件事，之後再去同公司同埋經理人溝通，我心諗就係試咗先，好彩自己有踏出呢一步，如果唔係就未必會見到大家。」他憶述拍劇時期需要經常咆哮，對於要兼顧參加比賽身心感到非常疲累。
周志康出席《中年好聲音4》24 強見面會。（娛樂組攝）
工作機會變多
提到早前受訪表示當年沒有把握機會發展演藝事業，他直言：「我曾經都有講過公司都可能有俾機會同資源我，我覺得係自己表現唔夠好。而家經過一啲洗禮同歷練，令到自己成長咗，我唔夠膽講係平步青雲嘅感覺，我做到自己最好就已經滿足。」
講到在《中年好聲音 4》以蒙面歌手「企鵝人」的身分出賽成績亮眼，家人是否亦感動落淚，他表示：「其實一開企鵝人得到唔錯嘅成績，屋企人嘅反應真係唔大，首先佢哋冇喺現場參加，就唔唔到時間去睇，阿女啲同學問你爸爸係咪企鵝人？我覺得都幾有趣，佢慢慢喺現場睇爸爸唱歌就享受呢件事，我覺得幾得意。」被問到參加節目帶挈有更多的工作機會，他坦言的確有，亦讓觀眾重新認識到周志康。
周志康憶述拍劇時期需要經常咆哮，對於要兼顧參加比賽身心感到非常疲累。（娛樂組攝）
偷偷在老婆面前喊
談及對於參加比賽是否壓力很大，他表示：「首先就係時間上嘅分配，一開始拍住劇比賽真係好煎熬，我真係攰到試過喊，攰到個人情緒少少控制唔到，我本身覺得自己嘅情緒係幾叻，但我覺得係時候比自己釋放出嚟，攰到真係冇時間去思考做緊啲咩，慢慢克服咗。對於自己嘅表現都係得一次機會，點樣去做好將平時練習嘅嘢盡量發揮得最好，呢樣嘢又係另外一樣壓力。」
被問到是否曾經在家人面前喊，他坦言：「我試過面對面同我老婆講話我好攰，我流緊眼淚嘅時候，我偷偷地喺度抹眼淚，我冇同佢講我喊緊，起碼有個出口同個對象一齊傾，同埋我身邊嘅戰友，例如我哥哥，有陣時會睇返網上嘅留言，有好多網民支持我都係好好嘅力量。」
ADVERTISEMENT
【👇送3M靜電空氣濾網體驗包4包👇】
