草蜢演唱會｜陳奕迅任嘉賓揭與蘇志威「爭女」恩怨追憶梅艷芳：如果無佢，我哋唔會走到今日(有片+歌單)

草蜢出道40周年舉行的《GRASSHOPPER Three In Love 草蜢演唱會2026》，昨晚(26日)於紅館開鑼，蔡一智、蔡一傑和蘇志威三子狀態大勇，全程勁歌熱舞，施展渾身解數，全場氣氛high爆。嘉賓陳奕迅登場更掀高潮，Eason與蘇志威公開「爭女」史，場面爆笑。當中亦不乏感人場面，蔡一傑首度開腔分享走出患癌打擊的經歷，草蜢三子多謝恩師梅艷芳，將3位屋邨仔帶上華麗舞台。在encore時段，3人唱出《寶貝對不起》、《半點心》、《失戀》和出道作《飛躍千個夢》，為演唱會劃上圓滿句號。

當唱畢《LONELY》後，蔡一傑感觸表示，相信3人能重踏紅館舞台，「最開心嘅應該係佢(梅艷芳)。」蔡一智指草蜢巡迴各地演唱再回到紅館，「想證明俾當初帶我哋入嚟嘅，俾佢睇，話俾佢聽，佢係眼光獨到嘅！」接著舉咪向觀眾問道：「呢位係邊個？」全場大叫「梅艷芳」他續說，三子希望將40周年演唱會獻給師父梅艷芳：「多謝佢，阿梅！我成日諗如果佢仲喺世界，呢個世界會係點？」接著3人合唱《愛將》後，接蔡一智續說，「當日3個屋邨仔用組合呢樣嘢，堅持咗40年，我要多謝我同學蘇志威，同我細佬蔡一傑。」蘇志威哽咽道，「好多人問我哋3個成日吵吵鬧鬧，點解唔分開，我發覺我哋3個唔係合作，我哋係一體。」蔡一傑感觸道，親兄弟也會反目成仇，但他們3個走到今時今日，繼續做好自己喜歡的事，未來沒有人知，哽咽道：「無論我哋3個邊個走先，來世都要繼續做兄弟。」繼而三子齊齊伸手，互相握緊拳頭打氣並合唱《心中的歌》。

演唱會尾聲，草蜢唱完《華麗舞台》後，歌神陳奕迅驚喜現身合唱《世界會變得很美》，全場氣氛高漲。3人大爆Eason雖曾為他們的歌曲錄開場白，但從未正式在舞台上合唱。不過陳奕迅卻自爆是草蜢的忠粉，「我真係fans嚟，我本來諗住拎你哋啲碟出嚟，我真係有架，但有啲係碎咗少少。」不過，惟獨對蘇志威，曾經有少許不滿，感情複雜，「我唔係好高興，因為佢搶咗我劉小慧！嗰時喺電台化妝間同佢兩個打招呼，特登避開佢。」蘇志威爆料：「我知你房入面有佢Poster嘛！」由於「吹神」可以吹足一個鐘，為確保演唱會程序繼續，蔡一智就拿出pickleball的球拍作禮物，Eason興奮收禮：「頭先劉小慧個女先請我食春卷……唔係蛋券至啱。」不過仍難敵Eason的吹水功力，他繼續指面對當下世界氣份，聽《世界會變得很美》就不時會感動流淚。接著Eason指蔡一智曾為他監製3首歌曲，本來打算選唱其中一首《快高長大》，但有感太個人，隨即他清唱了一小段，另一首是14字歌名的《如果這一秒鐘你跟我講你不愛我》已在巡唱唱了，故最後選了《第五個現代化》和，最後4人在台上傾了約6分鐘才再合唱。

草蜢完成頭場演唱會後受訪，他們形容今次是重踏舊地，亦是回到初心，因40年前由梅艷芳帶領首踏紅館舞台，由始至今都如演唱會主題「Three In Love」，3子視為慶祝party，心情輕鬆，就像賀壽。蘇志威自己腰圍在30吋以下，為演唱會落力操練，負責開場領舞；蔡一智更以普通話首度演唱新歌《我從小就喜歡你》，回饋fans。蔡一智開心見到很多跟隨多年的「老粉」，以及圈中好友，包括做打頭陣的嘉賓Eason，預告餘下6場陸續有重量級嘉賓登場，不過就絕對保密，呼籲大家拭目以待。蘇志威談到Eason「爭女」，他表示，「其實佢有講過睡房有我老婆(劉小慧)poster，唯一一張就係我老婆，嗰時我未結婚，男未婚女未嫁，佢擺床頭都無辦法。」他笑言早已成功「破冰」，蔡一智就補充不止Eason一個，「全港學生都嬲！因為劉小慧係『學生情人』！」

蔡一傑認真表示，今次40周年演唱會意義重大，「送俾師父梅艷芳，我哋仍然都好掛住佢，如果無佢，我哋唔會走到今日。我哋幻想如果佢冇走到，見到今晚我哋嘅成績，相信佢係最開心最恩惠嘅一個。」阿智深信遠方的梅姐會到這份心意。蔡一傑在台上首度開腔分享抗癌經歷，他解釋一直未有交代，因為不想大家擔心，認為藝人應該報喜不報憂，蔡一智補充說：「今次講出嚟，係希望幫到同路人，唔使太驚，只要正面去面對，放開胸懷。」阿傑認為只要樂觀面對，快樂因子有助抗癌，笑言可能多做善事，能及早發現及醫治，「7cm其實好大，當初醫生話惡性腫瘤，真係好震撼，但好快就將自己修正。我一定要好番，同大家見面唱歌，令大家好開心好開心。」他強調現時健康狀況穩定，繼續觀察，不需接受治療，亦毋須醫生駐場，阿智搞gag表示，「有陳醫生，Eason Chan！」對於在台上疑似跣腳，蔡一傑輕鬆回應，「有好幾下因為地下紙碎跣一跣，我馬步好穩！」