江若琳獲老公蕭唯展鼓勵再駕駛。
藝人江若琳前年12月在尖沙咀發生交通意外，其座駕失控剷上安全島後翻側，她一度被困車內，幸僅頭部受輕傷。事後，她曾透露留有陰影，更一度不敢再駕車，要由老公蕭唯展代勞，而該路段更被Google Maps惡搞改名為「江若琳彎」。
江若琳前年12月在尖沙咀發生交通意外。
堅持修好
雖然，該愛車當時嚴重損毀，外界都估計會報銷，但原來當時江若琳因不捨，堅持千辛萬苦把車修好；如今，愛車終正式「退役」，她在社交網發長文感謝8年來的陪伴：「再見啦！我既戰友L1NG930 ！！！！多謝你呢8年黎陪住我地拍拖，陪住我地結婚？陪住我生仔，陪住Owen仔返屋企，多謝你令我地平平安安，一直用你既肉身保護住我（即使闖過江若琳灣，你都令我冇穿冇爛（個個都話叫我放棄你，話整唔返架啦傷成咁（但我真係好唔捨得，千辛萬苦都整返好你，終於等到你強勢回歸，陪我走遍成個2024/2025年廣東區巡迴音樂會！你真係好強。」
她續分享愛車「退役」是因人為失誤：「估唔到最後係油站被人為失誤柴油入錯左電油！正式退役。多謝你呢8年既陪伴同保護我地一家大細！我地會掛住你的！一架車承載住滿滿既回憶」網民紛紛感不值留言：「千辛萬苦救返架車……..點知會死喺俾嘢佢食嘅地方」、「你咁愛錫架車，竟然俾人入錯油KO咗」、「蓄意謀殺」。
