姜濤明天(30日）27歲生日，姜濤香港後援會今年移師香港全新地標啟德體育園，迎接一年一度的姜濤誕。今年以「Keung’s Family」為核心概念，強調「家」的溫暖與守護，舉行連串的「姜家人慈善生日慶祝活動 2026」。今日(29日)活動亮點為晚上於啟德體藝會舉行的「姜家人慈善生日會 2026 」，8米高巨型充氣姜家人蛋糕裝置及姜家人大合照。今日生日匯演、雖然今日(29日)中午一度發出黃色暴雨警告，但無阻姜家人「風雨不改」的約定，下午已聚集於啟德園區打卡和派發姜誕應援品。
全場6,500姜家人合唱生日歌
生日會準時於8時開始，由舞蹈員以姜濤歌曲的Dance Medley 掀序幕，學長look的姜濤登場頓時全場歡呼，他首先跟姜糖玩連串遊戲，首先拋簽名壽桃公仔送給觀眾，全場興奮搶挑。接著挑戰「人生四格」，由合作無間的「大眼姐姐」提供換裝造型，姜濤分別以哈利波特、火影忍者和公子型造讓fans拍照。姜濤與觀眾玩fans cam大合唱後，再玩「姜Admin話」時，帶領全場fans站立、轉身、舉手搲頭，非常百厭。遊戲環節完畢後，小姜姜和小濤濤與生日蛋糕齊齊出場，全場6,500名姜糖大合唱生日歌後，姜濤切蛋糕及許願，他搞笑指：「冇蠟燭就許啦！」
自我質疑 不值得撐
許願後他感性分享，指出道8年的時間非常壓縮，其間有不少經歷，令他不時自我質疑：「我呢個人真係咁值得撐咩？」全場姜糖大叫：「值得！」他自言，每年生日會見多眾fans仍感驚訝，「可能仲係有種自卑喺度，疑問自己係咪deserve這一切，思考自己要做咩嘢，令大家覺得抵撐。」雖不知在座每一位來自甚麼行業，但相信感情是共通的，「我哋遇到好多事，有脆弱一面，唔好放棄！其實我諗過放棄，但大家俾咗好多力量我，每次生日會對我嚟講係一次叉電，就正如我俾大家嗰封信，你哋係我嘅太陽，每次生活遇到不愉快，見到你哋就像叉電，希望我自己呢個超人，可以對得住你哋呢個太陽，我以後會繼續！」接著他坐在台上欣常姜糖製作，長逾7分鐘的片段後，獻唱《追愛狂想》，並走落台與fans握手，非常寵粉。當他看到啟德主場館巨蛋外牆，寫上「KEUNG TO 27生日快樂HAPPY BIRTHDAY生日快樂」走馬燈飾時，就向姜家人說：「我會爭取喺呢度開騷。」
人生四大崩潰點
生日會尾聲，姜濤花了約10分鐘分享自己鮮為人知的真實一面，過去人生的四大崩潰點。略顯緊張的他，吸一口氣問到，「其實你哋知唔知我以前係點樣嘅？出道之前嘅我，嗰段人生，好似喺訪問入面講過。係呀，好百厭，我唔係一個好懂事嘅年青人。其實我以前喺小學、中學嘅時候，真係一個好討人厭嘅人，因為自己嘅性格、身形、學習，其實我都唔係一個好得人鍾意嘅人……」他半笑說指大家可當他是自言自語，即使這番話會改變姜糖們對他的印象，也想坦白說出來，他嘆氣道：「以前有鍾意嘅女仔，唔夠膽講，又會同人打架，其實都係為保護自己而做，人為咗保護自己，性格真係會變。」他表示參加《全民造星》時已生性，他坦言，「我人生第一次最迷惘嘅狀態，就係我離開中學，學校話冇書讀，讀書太差。你哋知唔知我有留 班？不過好多人唔知嘅係⋯⋯我其實留咗兩年班。嗰陣時我唔好意思同大家講，我留咗兩年班。其實我讀到中一㗎啫，我喺以前嘅訪問入面講過，我剩係讀到中三其實係假嘅⋯⋯你諗下中一嘅嘢有幾難，但我點樣讀都讀唔到喎！」
輟學工作 重返校園
姜濤自知非讀書材料，中三後開始在中環一間咖啡店做兼職，「嗰時好迷惘，執緊垃圾時，就諗我將來會點？」其後獲社工安排可重新讀書，但期間必修先讀3個月課程，中學時經常逃學的他，每日由銅鑼灣去馬鞍山搭兩小時車去上學，但從沒缺席。不過，後來得知所升讀的學校並非正規學校(青年學院)，曾感到非常灰心，他形容是第一次崩潰，卻沒有放棄，更找老師補習數學，「嗰時數學好差，買一年班嘅書，都係唔合格，基礎太差！」不過他坦言最終夢想是做歌手，曾參加社區歌唱比賽，內地的《快樂男聲》落選，是第二次崩潰時刻，但仍不想放棄，給自己一年時間，其間參加《全民造星》奪冠出道。他坦言發展順利，直至在2023年叱咤頒獎禮唱《鏡中鏡》掃掃掃事件，「第三個崩潰點，就係一件事，可能好多人以為係『掃掃掃』嘅事。其實掃掃掃之前嗰段時間，我已經開始崩潰，我做嘢會打玻璃，會罵人，會對客人冇禮貌。個人好飄，講真咁快紅，點會唔飄！好多謝身邊一啲人將我拉返嚟，這是人生第三個崩潰點，好彩身邊人拉我返來，我都捱過咗。」
鞠躬哽咽 頒每個抉擇獲信任
第四個崩潰點是26歲這年，幸好將會踏入27歲，雖然他指故事太長，日後再分享，相信不少人都記得姜濤去年墮海、開第二次個唱等事件，他續說：「總之我熬過咗，好希望自己新嘅一歲可以有越嚟越好嘅表現，無論做人定做事。希望你哋記住，無論幾難涯，你想放棄都好，想點都好，好老套，好多人都講唔好放棄，但當你真係遇到嗰刻，要唔放棄，講真，呢件事有幾難。所以以後無論我發展怎樣，我都希望你哋相信我，因為我每一個選擇都係我自己做，我相信自己可以做到嘅選擇。」接著他送上偶像羅志祥的《愛不單行》，一度硬咽。最後他不忘呼籲姜家人，要將自己放在重要位置，「任何生活中遇到嘅困難，我哋一齊加油改變，做好自己，將留喺你哋心目中最美好嘅位置，將自己唔好嘅一面攞出嚟做好佢，Thank you。」他以90度鞠躬後，雙眼通紅，強忍淚水走入後台。