工聯會立法會議員陳穎欣在地區辦事處舉辦「陀螺王挑戰賽」
陀螺再成為城中潮流，工聯會立法會議員陳穎欣喺地區辦事處舉辦「陀螺王挑戰賽」，仲親自試玩。佢話由於今次反應踴躍，今個月會再舉辦比賽，為社區注入活力。
陳穎欣、葵青區議員周潔莹，聯同居民組織「葵晴社」噚日喺石籬二邨地區辦事處舉行首場「陀螺王挑戰賽」。有大約100人參加比賽，年紀最細、13歲嘅馮小朋友更加過五關、斬六將，經過淘汰對戰，成功勇奪總冠軍，贏得獎座同限量版陀螺。
本月再辦比賽
陀螺承載住好多香港人嘅童年回憶，陳穎欣同周潔莹都親身試玩，透過陀螺同街坊增進交流，凝聚社區和諧力量。陳穎欣預告今個月會再舉辦比賽，希望透過活動促進跨代共融，增強居民參與感同歸屬感。