江玉歡不滿有議員「顧住周圍去，跟住寫遊記」
立法會前議員江玉歡而家仍然繼續評論時政，佢直指有啲議員顧住周圍去，跟住寫遊記，都唔肯定佢哋知唔知議員職責。
事緣有報章政情專欄提到議員上任5個月，但多位新丁都被指仍然未進入角色，旅遊界議員江旻憓、社福界議員陳文宜都上榜。專欄提到有旅遊業界人士透露，江旻憓曾經話希望大家畀兩年時間佢適應。不過江旻憓議員辦事處回應報章查詢，否認江旻憓曾經講過呢番言論，回覆：「她從第一天已經好清楚，自己有責任全面代表旅遊界，為業界發聲、跟進各項議題。」
指議員每日轉發新聞似發射站
江玉歡轉發新聞話：「試用期！？五個月好長㗎喇！」佢覺得無論之前有冇經驗，5個月應該乜都上手，見到成績。江玉歡坦言如果只係周圍去做親善大使，市民唔會收貨。佢話如果同市民報告嘅，大部分都係出席酒會、剪綵、活動等行程，應該思考一下。佢仲評論有啲議員日日轉發大小新聞，好似發射站咁，令人無語。
