黃淑蔓(Feanna)日前(9日)為新歌《餓》MV舉行首播發布會。
黃淑蔓(Feanna)日前(9日)為新歌《餓》MV舉行首播發布會，與逾百「蔓頭」（她的Fans暱稱）一同見證新歌面世。她首度公開演唱新歌《餓》和《Hey Feanna》，並與觀眾玩鬥快食炸雞遊戲，,勝出者更獲Feanna親自餵你食炸雞。MV 中的Feanna不顧儀態喪塞食物入口，現場觀眾邊睇邊大讚好靚女，氹得她哈哈大笑。不過自命活潑「E人」的Feanna坦言公開食相感到有點害羞，說：「見到咁多人望住我食嘢個樣，原來係比我想像中害羞，真係好緊張，我一路望住大家嘅反應，睇住大家嘅表情，心情有少少複雜。」
如願唱Band sound
Feanna表示她一直很想唱Band sound，開心公司讓她推出Rock味濃新歌，並如願邀請樂隊Dear Jane的結他手Howie作曲，她說：「終於我有機會唱到一首咁『惡』嘅歌，仲要多謝黃偉文Wyman填詞，因為佢寫入咗我個心！呢首歌想表達其中一個意思：『適可而止』，例如食嘢食少少可以好開心，但食得過量就會辛苦；感情事亦一樣，太過戀愛腦，會逼得對方太緊，所有嘢過量都係唔好㗎！」
鬥快食炸雞 Feanna完勝
為配合MV主題，發布會上，Feanna與觀眾比賽鬥快食炸雞，她說：「今次拍MV好似與時間競賽，因為要喺越短時間內食越多嘢，個MV至會越好睇，但係『咬』同埋『吞』嘅過程，比大家想像中更加花時間，一啲都唔容易。好想大家同我一齊體驗吓呢個感覺，所以設計咗呢個遊戲同大家玩！」結果Feanna首位完成任務，笑言：「我冇諗過係我贏囉，可能因為拍MV，我已經練習咗好多次。」而一位男參賽者則緊隨其後，當主持人阿酸公布遊戲其獎品是「黃淑蔓親自餵你食炸雞」後，全場起哄。Feanna用竹籤拮炸雞餵食，得獎觀眾笑得好幸福，而其他參賽者獎品是Feanna 送出特別版的盲盒公仔。
預計被鄭伊健拒絕
問到如果玩鬥食遊戲，Feanna想挑戰哪位圈中人？她說：「我諗吓先，首先唔可以有偶包嘅⋯⋯陳健安啦！我覺得麗英好玩得，應該同我有得切磋吓。（鄭伊健呢？）佢一定會話食嘢食咁急傷胃，唔會肯同我玩呢個。不過，食得咁急真係對身體唔好，大家要好好品嘗食物，慢吞細嚥。」她更強調MV中所有食物，最終都被台前幕後工作人員食清光，沒有浪費。
為個唱練體能
Feanna將於11月22日及23日在黃埔TIDES舉行首個個人專場演唱會《蔓蔓蔓蔓蔓蔓Echoes of Man》，門票明早優先訂購，下周三(21日)公開發售。Feanna表示：「我嘅第一個專場，而且全企位，真係有啲緊張。最重要係練體能，因為觀眾全企位，所以特別揀好多自己嘅快歌，亦有啲改編歌，仲有啲情緒比較激昂嘅歌曲。觀眾都要準備好體力，喺台下幫我打call就最開心！」
