曾經喺香港發展嘅43歲台灣藝人「奀妹」傅天穎，離婚5年，日前喺私人fb發文「想一了百了」、「一走了之」，朋友紛紛留言，擔心佢一個人湊12歲囝囝小天子又要照顧媽媽，要佢千祈唔好做儍事。佢事後透露，自己上月確診氣喘，每日需吸2罐藥另要食藥，天氣凍或霧霾，就會攰到喘唔過氣。而年邁母親又有心臟病、腎臟毛病、關節問題；另一方面仲要持續觀察小天子嘅癲癇問題，令佢身心崩潰，一時忍唔住先至貼文。佢話，呢兩個月為咗阿媽及兒子跑咗7次醫院，目前演藝收入微薄，靠直銷維生，每月家用開支4萬(約10,735港元)，啱啱夠用！佢又話所謂一走了之，係想返到佢最熟悉嘅香港，「那邊我朋友多，想放個假，大家都想太多」！