西王特鋼昨收報1.02元，跌0.9%。圖為公司網頁。
西王特鋼(1266)無論比起場內鋼鐵股，又或者祖國特種鋼行家，市帳率(PB)都係平咗大大截，抵搞。
西王特鋼係山東省大型特種鋼製造商之一，2012年2月上市價2.65元，現價(1.02元)潛水61%，得0.5倍PB。場內鋼鐵股鞍鋼(347)家陣0.63倍PB、重慶鋼鐵(1053)0.64倍。
又喺A股上市，同樣係特種鋼企業，有撫順特鋼(滬：600399)，PB去到近7倍、方大特鋼(滬：600507)近兩倍，南鋼(滬：600282)1倍。比起祖國行家，西王特鋼PB，更加大折讓咗84%！
西王特鋼啱啱今年上半年，純利增長12%，到2億銀人仔，當全年度起個孖到4億銀人仔，只係溫和增長4%咁大把，預測市盈率(PE)已經keep喺4倍超低搞水位。
再講，嚟緊日子，特鋼所用到瓣數，好似油井、油氣管，重型機械等等，都食住包括中俄油氣管鋪設、頁岩氣開採，經濟帶(好似長江流域、絲綢之路)重中之重國策，西王特鋼長搵長有。
西王特鋼大股東西王投資，揸咗集團75%，去到爆燈權益，街貨市值得5億銀。中港股市大融合，以西王特鋼超抵搞基本面，加埋細奀市值，俾資金辣起，唔難。呢轉買西王特鋼，當翻半番計數，到1.55元，PB都係得0.75倍，6倍PE咁大把，未有耐追到上邊任何一位行家。
作者為中細價股專家