講到近期必玩嘅遊戲，土下座應該會選擇上星期已經推出咗嘅《古惑狼 瘋狂三部曲》(Crash Bandicoot N. Sane Trilogy)啦！相信好多人一見到呢個名，都會情不自禁大叫好玩、玩過，講番歷史，《古惑狼》第一次面世已經係1996年，足足20年以上時間，因為呢隻game亦令到Naughty Dog成名。比較有趣嘅係中文譯名《古惑狼》，都好有當年《太空戰士》式嘅「亂作」感覺，因為「Bandicoot」呢個名都好明顯話俾大家知呢隻唔係狼，同埋事隔咁多年，都唔係太明白「古惑」喺邊……講番今集，其實係一次收錄晒當年3集嘅內容，而玩法就係完全保留以前嘅形式，但畫面就全部變成超高清貼圖，如果係PS4 Pro嘅機主仲可以試到4K解析度，所以又算係remaster又算係remake，值得推薦啦！