座堂建於1849年，曾歷多次修復和改建，於1996年被列為法定古蹟。
市中心呢個字，顧名思義，係城市的中心點。隨著城市發展不斷向外擴展，市中心亦變為區域，並且相應變遷。不過無論範圍點樣改變，呢一個地方，永遠都係香港人心中嘅重要位置——中環。
坊間常謂「英雄被困筲箕灣，不知何日到中環」，各路英雄，莫問出身，不論生活或休閑，耐唔耐都要現身中環。中環、西環、上環、下環，四環合為維多利亞城(City of Victoria)的行政區劃，並且於1903年豎立刻有CITY BOUNDARY 1903之界碑，以象徵識別城市範圍。隨著灣仔及銅鑼灣嘅迅速發展，已經冇乜人記得下環與及後期嘅東角名字，同樣亦有不再被稱環尾一樣嘅筲箕灣，而界碑亦由最初數十之量，消失至現時嘅7減1塊。
唯獨座堂，永遠擁有
講返Central先，因英人侵佔後對香港島地區嘅劃分發展而定為中心。其實中環初時唔止係商業重鎮，最重要喺政府機關。而喺軍營附近，竟然有一座非官方亦非商業嘅大型建築物，仲要係業權同土地可永久擁有。根據《英皇制誥》(香港憲章/Hong Kong Letters Patent)，指明土地皆屬英國皇室，所謂「賣地」只不過係長時間租出使用權利。初期以99年計起至到1997年，再有10倍如太古城的999年，唯獨一直可以永久擁有而非官地(Crown Land)的，則只有聖約翰座堂建築群。直至及後嘅《1899年聖約翰座堂條例》才附有出售限制，正好反映聖公會為英國嘅國教關係。
唯獨香港，配搭不同
St John’s Cathedral建於1849年，叫得座堂Cathedral正代表主教座位及地方行政長官，甚至亦為英軍駐防軍聖堂。其高、直、尖嘅非弧拱型設計，外看正係哥德式(Gothic)嘅建築特色，無奈當時為要遷就材料與技術，簡化為諾曼式(Romanesque)，所以原定在旁定風用嘅尖塔亦沒有興建。從鳥瞰角度可見其十字架形狀，而兩側設有偏殿。雙層瓦頂、麻石(即花崗岩)、青磚、百葉窗同埋開啟的木拱三葉草及四葉草形窗框、大門地上嘅景教十字架砌畫、北座玻璃畫上嘅漁村和舢舨、甚至主教座位扶手嘅龍頭設計，都叫座堂添上唔少香港傳統地道品味，與別不同。
唯獨初衷，薪火相傳
雖然英國以船堅炮利強行佔有香港作殖民擴展，但是傳教士確係有心為這個地方進行宣教及扶貧工作。二戰前座堂已經服務中國北海麻瘋病患者，作衣服及藥物等募捐。日佔時期座堂雖然曾經被迫成為日軍會堂，並且重光之後與英國政府關係開始疏離，有幸當時座堂何明華主教，代表座堂帶領信徒於1949年成立聖雅各福群會，並向灣仔區之赤貧人士提供服務，雙方至今合作無間，無忘昔日傳教士對小島抱負的初衷。
保護教堂以免被強拆，保留文化以免歷史被沖淡。由昔日反智視宗教係人民嘅鴉片，到近年無視基督教對社會嘅貢獻。身體最為誠實，睇咁多人申請子女入讀教會學校便可得知。中環何解咁重要，其一原因正係聖約翰座堂，只需逗留片時這法定古蹟，就會深刻發現其如何守護香港。
