吳若希初來港被笑有口音 2蚊雪糕都嫌貴

吳若希（Jinny）近年經營個人頻道，不時拍片分享一些有趣的片段。Jinny日前重遊成長的地方，更邀請了一位她聲稱為「勁似周柏豪」的靚仔小學同學帶大家重遊小學必經之路，及分享小學生時代的生活點滴。

Jinny跟小學同學同遊荃灣和小學，行到荃灣一條街道，Jinny表示︰「我記得嗰時成日都經過呢度，因為我媽咪喺福來邨後面個街市側邊，喺salon入面幫人染頭髮。」而小學同學的屋企人開海味店，Jinny還試食了鮑魚，小學同學指着店裏的元貝說︰「呢啲就係我細細個嘅零食啦！」Jinny即羨慕表示︰「零食啊？嘩！呢個同我細細個好唔同！因為我細個真係攞兩蚊買個快餐店雪糕都已經覺得好貴嗰啲呢！」

其後，二人返回讀書的小學，同學大爆Jinny細個已經「高人一等」，生得比其他同學高。而福建出生的 Jinny 更大談當年因剛剛移民到香港，發音不正，有一次將「塗改液講錯塗改（葉）」被小學同學取笑: 「嗰時我啱啱落嚟香港，廣東話都未講得正，當你笑完我就知道『原來唔係咁講』」不過Jinny冇嬲之餘，更大方表示被取笑才有進步。