Serrini孖王菀之演唱會加開終極日場花7位數字會展打造M形舞台

兩大才女Ivana(王菀之)和Serrini將於12月2至4日在灣仔會展舉行《Ivana x Serrini Fairy Nice To Meet You Live 2022》演唱會，「藝術精靈」Ivana和「真美精靈」Serrini宣告聯合開騷，3場秒速爆滿，加場之聲不絕於耳，兩位精靈應樂迷要求，加開12月4日下午3點終極日場。

籲觀眾扮「精靈」睇騷

樂迷反應熱烈，主辦單位特地花上7位數字打造首次在會展出現的Fairyland「M」字形舞台，為觀眾帶來極佳的視覺效果，Serrini興奮表示：「我第一次見台圖，個舞台好壯觀，係咪會展第一次有這樣大的舞台，我就唔知，不過應該幾震憾，自己都好期待真實上台嗰日會幾興奮。」今次開騷日子臨近聖誕，兩位精靈都想同歌迷一齊提早慶祝，希望觀眾一齊可以玩dress cod入場，Ivana話：「如果來睇騷，可以打扮自己似精靈啦，或者有聖誕感覺啦，我估都幾開心呀。」至於兩人會有甚麼特別造型？Ivana形容是超級特別，「我哋會化身好多唔同嘅精靈，亦充滿藝術感，只希望我到時着得落，哈哈！」