黃梓樂在《年少日記》演鄭中基與韋羅莎的兒子。(羅錦鴻攝)
鄭中基(Ronald)與「老闆仔」黃梓樂、盧鎮業、韋羅莎、陳漢娜合演的電影《年少日記》，昨晚於第20屆香港亞洲電影節舉行首映，Ronald與老闆仔出席電影節開幕禮接受傳媒訪問，在戲中演嚴父的Ronald與演太太的韋羅莎，不時對演兒子的老闆仔動粗，Ronald直言非常心痛，「其實拍完呢套戲心情好沉重，對住個小朋友唔係鬧就打，仲要用好難聽嘅說話鬧佢，話佢垃圾，反而梓樂好明白事理，叫我盡情鬧，佢知係假嘅。」其中一幕就要在家中用雞毛掃追打黃梓樂，為免NG一打再打，索性不留手，點知打到連雞毛掃都斷埋，「我唔想睇落去無力打要再拍過，於是同佢講︰『你忍一忍啦，我會用啲力打，一次過就算喇！』」黃梓樂就認為即使Ronald哥哥話唔留力，其實都好輕手，「拍攝時都有墊，而且佢打完都同我講對唔住。」相比起來，被韋羅莎摑黃梓樂一巴更痛一點，「但我都叫她大力啲，我都唔想拍第二次。」
想約姜濤打籃球
對於獲提名手金馬獎最佳男配角提名，10歲的黃梓樂表示，「入圍已經當贏咗，唔會奢望會得獎。對手好勁，香港有林保怡哥哥，佢做得好好，我已經睇咗《白日之下》，都有喊。」不過鄭中基就從旁指導，教他答得更得體，「你應該話︰多謝大家，我已經贏咗喇！」梓樂亦好聽話地重答一次。早前姜濤曾表示要親自恭喜梓樂，梓樂就話未見到對方，但就有在IG約他打籃球及打邊爐，問到籃球技術如何？梓樂打趣說︰「我打邊爐叻啲！」
早前有報道指《闔家辣2》即將開拍，Ronald表示從未聽聞，「我都想，日日開工都好歡欣。」梓樂就大讚《闔家辣》好好笑，問到有冇興趣參與續集︰「好呀，我做你(鄭中基)個仔！」Ronald聞言，「我又生？我生咗Edan(呂爵安)後又生你？我同Gigi(梁詠琪)好悶定喇，不如話Edan生你，我做你阿爺啦！」梓樂亦和應要做Edan個仔。