棍網球U20美國隊隊員同香港小學員交流，齊齊試著華服（鄭泳舜Facebook）
「M」品牌盛事「2024世界棍網球女子U20錦標賽」明日（15日）起一連十天上演，除咗東道主香港，賽事亦都雲集另外19支球隊幾百位棍網球年輕高手訪港。難得一場嚟到香港，爭取衛冕嘅美國隊當然要趁機會嚟一個深度遊，走訪深水埗區，體驗香港獨特嘅文化風情。
做過深水埗區議員嘅體育學院副主席鄭泳舜自然要一盡地主之誼，陪同運動員感受香港文化。美國隊隊員兵分三路，先參觀鴨寮街跳蚤市場同北河街街市等地區景點，自然唔少得要去拜訪文青勝地嘅大南街、汝州街和基隆街，行一行特色布行同皮革店，期間更有機會品嚐豆腐花、腸粉、芒果糯米糍等地道美食。
鄭泳舜冀未來外隊運動員落區
美國隊玩完一輪，都要回歸棍網球本業，嚟到深水埔街坊福利會同一班青途棍網球訓練學員體驗活動，隊員同小學員仲齊齊換上華服，實行文化交流。阿舜話，未來陸續有大型體育活動喺香港舉行，都可以安排運動員落區同市民交流，令運動員作賽之餘，都可以遊覽下，發展香港成為體育盛事之都。
ADVERTISEMENT
送健之堂舒壓好眠足湯 x 石墨烯足浴袋
