陳國邦加入外貌協會廖碧兒興奮演喜劇

由陳國邦、廖碧兒、袁富華等，為ViuTV劇集《娛樂風雲》進行拍攝工作，飾演娛樂公司高層的陳國邦在劇中造型甚為突出，閃粉金髮配鮮色襯衫，與廖碧兒在「大天下」大鬥法，爭取老闆楊永樂(袁富華飾)的信任；廖碧兒則高興稱，終於有喜劇拍，不用再演心情沉重心事多的角色。

陳國邦表示，為投入角色，專程向貪靚朋友請教，他說：「今次要加入外貌協會，角色同我好大分別，平時我唔太講究打扮，角色作為電影部主管，又富創意，應該著重外表，所以我要向貪靚嘅朋友著手，留意佢哋嘅行為舉止。」被問到拍攝期橫跨暑假，會否影響家庭生活，她則絕不擔心，「娛樂圈工作一向作息唔定時，太太都係娛樂圈人，所以佢同囡囡都明白假期都要開工，唔開工時就放假，唔怕會忽略囡囡。」

帶姪仔夜蒲冇違和感
廖碧兒表示，剛從外地回港即開工，未能適應時差，「因為之前幾個月都響加拿大，講英文多，要習慣番講中文，仲有少少時差未適應，所以都未習慣開工節奏。」廖碧兒指，其實一向鍾意拍喜劇，偏偏遇不上，她續說：「呢幾年參與嘅角色，都係有好多心事同感情事，今次終於係笑片啦，所以好興奮，會輕鬆好多。我演出嘅角色係經理人Mary姐，對藝人要軟硬兼施，同我喺現實中對住班姪仔好似，都會一時好惡、一時要同佢哋好老友，關心佢哋嘅近況。」廖碧兒指，勝在樣貌還算後生，可以帶姪仔落酒吧玩而沒有違和感。