李夏茵覺得，香港公立醫院係時候研究下畀病人見下隻狗。(蘇文傑攝)
香港愈嚟愈多人鍾意養貓養狗，不過《醫管局附例》列明任何人都唔可以喺醫院管有、保管或掌管任何動物。新任醫管局行政總裁李夏茵話，外國好多醫院喺較嚴重嘅病房，都已經容許小狗等寵物入去陪下病人，特別呢個年代好多老人家都只係得隻貓、得隻狗，「佢嘅親人就係得隻狗」，覺得香港公立醫院係時候研究下畀病人見下隻狗等寵物。
未留意成首任「坐正」女行政總裁
本身係愛狗之人嘅李夏茵提到，一生人共養過7隻狗，包括依家養緊嗰兩隻，認為飼養和照顧寵物嘅同時，其實都教緊主人做人、點樣待人接物之類。佢又話，大口環根德公爵夫人兒童醫院一向都有狗醫生探訪病人嘅傳統，亦會諗下未來搞唔搞多啲寵物友善員工活動，包括每年嘅醫管局步行活動。
李夏茵係醫管局成立以嚟第一個「坐正」嘅女行政總裁，佢話自己之前都冇留意呢樣嘢，但上任後都感覺到有啲嘢唔同，「我唔知呢個係因為我係女性，定還是我係另一個人，覺得對同事關顧可能容易表達啲」，笑言男人通常懶有型，就好多嘢都唔講。至於上任行政總裁高拔陞有冇過返兩招畀佢？李夏茵話反而係佢畀返貼士高拔陞，「我叫佢養返隻狗啊，佢真係養。」
不可能所有叻人行醫
另外，中學文憑試上個月放榜，16個狀元、超級狀元同終極狀元入面，有11個都話會讀醫，佔總數接近七成。發展局局長甯漢豪之前希望社會應該要支持多元化職業選擇，舉例好期待有狀元話想做大廚。李夏茵個人就認為，唔係亦冇可能要所有叻人投身醫療行業，如果年輕人全部都做晒醫療嘅話，「我哋唔使食飯啦、我哋唔使做其他嘢」，直言都幾唔贊成一面倒，唔好因為叻就話一定做醫生，而係應該想為病人服務、想大家都健康，「我真心覺得係要好醫生。」
醫管局研整合求診流程濃縮病人排隊時間 李夏茵信醫護因熱誠留公營體系
▼中暑熱衰竭分別▼
ADVERTISEMENT
第3輪消費賞開始！勁送iPhone / 冷氣機 / BB車 / 空氣清新機！
