許廷鏗（Alfred）最近推出新歌《單數》，忙於到電台宣傳新歌。過往甚少參與MV演出的他，難得參與演出，更Chok到盡頭，他表示紅館騷後身型難得變瘦，所以決定在MV中盡Chok。Alfred說：「之前啲Fans成日話我喺MV少出鏡，依家出多啲樣，大家OK就再出多啲。呢個算係最Chok嘅MV，平時嘅我係『Kai』行先，今次想有個新形象，曲風都係新嘗試。」他透露稍後物色女主角為情歌拍MV，當提議他邀請之前在演唱會記招奪他螢幕初吻的巴西女模特兒時，他估計對方應該返回巴西了。
提到好友林欣彤（Mag）再次做同門師妹，Alfred主動話：「佢話我係佢個媒人，其實係同事負責穿針引線，因為我哋呢幾年有一個共同音樂計劃，有同事幫我哋諗啲Creative嘅嘢，加上Mag見到我同公司合作咗兩年，一至兩年內出到20幾首歌，又開咗演唱會，成績唔錯，自由度又高，咁Mag都絕對有條件做到，希望年尾可以同佢有合作。」