坤哥看見Amy，即又攬又錫。
吳業坤(坤哥)、朱晨麗、何廣沛及龔嘉欣等，前晚為《大醬園》開工，適逢同劇的樊亦敏(Amy)48歲生日，眾人特別在片場為Amy賀壽，坤哥更作狀吻賀Amy，稱已將自己整晚獻給Amy。
坤哥與Amy其實一早結劇緣，坤哥說：「我同Amy很早已經合作，之前響《愛．回家》我哋演母子，今次又可以同劇演出。」坤哥大讚Amy是一位靚姐姐及好好的前輩，並說：「Amy好好，佢送過一張外景凳俾我。」問到他送了甚麼禮物給這位姐姐，他笑說：「我喺劇集群組話送自己俾佢，佢想點就點啦，一晚半晚，冇所謂啦。」
自稱是安全駕駛者
日前坤哥駕駛途中被一輛私家車從後撞上，慶幸人冇受傷，他稱已交給朋友處理，因自己是心軟的人，坤哥說：「撞我個司機一落車就揞住心口，不過我架車俾佢撞到好傷，起碼五位數字金錢嚟做維修，本來打算換車，而家件事通晒天，舊車賣出去唔值錢。」問坤哥會否考慮不揸車，他稱不會，因自己是安全駕駛者，只是給人撞了，他又說：「物色緊慳油嘅二手車，之前買新車計過條數覺得唔划算，都係做返慳家小朋友算。」
朱晨麗表示送吻給Amy作禮，並笑說：「我唔係個個人都錫。」