蔡興麟復出舉行演唱會

久未有在幕前現身的歌手蔡興麟，昨日到電台接受訪問，他透露正籌備新專輯，收益將捐到慈善機構，更計劃在年尾舉行演唱會，他說：「慈善新碟籌備得七七八八，最想係做黑膠唱片，碟嘅盈利會全數捐出，希望幫到傷健人士。」相隔25年復出舉行個唱，蔡興麟稱：「應該會響九展舉行，依家心情唔算好緊張，只係諗緊點樣做到最好。」他指，已經獲得薛家燕、李樂詩、肥媽及彭家麗等答應做嘉賓，又稱演唱會應該舉行兩場。