呢個Sammi，令唔少人眼前一亮。
《熱力節拍Wou Bom Ba》，難能可貴在有關淑怡勁歌熱舞。
九十年代的設計美學。
唱《打開天空》時的陳慧琳。
「乜乜Red Hot Hits」過戶到寶麗金後，華星自行整咗首合唱歌《愛情傻戀lalala》。
九十年代。一開始如夢似幻，到最後急速墜下。
1.我由1990年的苦悶中學生，到1999世紀末，成功變成「社會的齒輪」。
2.「社會的齒輪」，余鳳芝在1992年某個落大雨午後無奈地說。
3.1992年的我，肯定冇咁傷春悲秋。我一邊擔憂著《龍珠》故事發展，同時亦為自己個髮型擔憂——How to梳一個殺死女的「城城頭」？結果，掹車邊地完成了，望著鏡中的嗰條友，未殺死女前先殺死自己。
4.所以睇《哪一天我們會飛》時我難免疑惑：Why裡頭冇一個男學生梳「城城頭」？難道(讀Band 1學校的)他們統統沒有聽過《火熱動感lalala》？
5.而我好記得那一年，某天早上返到學校，(從來不曾為學術展開任何討論的)同學們正在熱烈討論這一首歌——是的，我們都不能夠唱晒成首歌，但必定記得那幾個關鍵位：A.狂loop的lalalalalala——注意，不是唱「啦」，而是唱「奶」；B.一到夏季個Key升高——當第一次唱到「一到夏季氣勢升高」呢句時，記得將個Key有咁高升咁高，否則便唱不出Sammi神髓！
6.仲有C——Sammi在MV中不時露出的香肩(以及搭在香肩上的吊帶)，以致我和不少血氣方剛男同學首次覺得：咦Sammi其實都幾正喎。
7.1992年，冇人會開口埋口提你廣東歌不死——因為從來冇諗過會死。這麼一個香港樂壇黃金盛世，這麼一首由某商品(法例規定這類商品不能賣廣告，不寫出來了)同華星合作的勁歌，是多麼的勁；那個梳著「城城頭」的城城(城城唔梳「城城頭」梳乜頭？)，舞姿是多麼的有型；就連梁漢文許志安也恍如受到城城感召，型埋。至於Sammi，則以唔知高出幾多度的歌聲，為這首本來已經好好聽的歌再Add了無盡的Value。作為「乜乜Red Hot Hits」頭炮，《火熱動感lalala》絕對是九十年代的亢奮註腳。但你問我首歌其實講乜？唔知喎，我只知誰若想歌唱放心唱，要開夠六千場。
8.「乜乜Red Hot Hits」從此成為香港樂壇年度盛事，並由華星過戶到(當年雲集最多紅歌星的)寶麗金。1993年，《熱力節拍Wou Bom Ba》，關淑怡 + 兩名寶記小花湯寶如劉小慧 + 草蜢主唱，問心，以歌論歌，是擺明及不上《火熱動感lalala》，但同樣熱熱鬧鬧，那個玩街頭籃球Concept的MV，也食正當年NBA熱潮。《鼓舞飛揚》則有點打茅波，只是將當年寶麗金金曲重新編曲再合體的串燒歌，但個MV好睇嘛，一個MV就俾你睇晒當年寶麗金的男女紅歌星。《非常夏日》不玩大堆頭，只得一男一女合唱——但那一男一女是張學友和王菲喎，夠殺啦。然後《打開天空》，則交由當年寶麗金副線正東力捧的四位新人去唱——已經OK紅的陳慧琳、好Q高音的邱穎欣、始終紅唔起的陳建穎，以及「從旋律裡講說話」的陳曉東(呢句唔知點解地唱得特別低音，低到令人難以忘懷)。
9.打開天空後，香港樂壇由盛世開始步向衰落。有人話是因為金融風暴，有人歸咎翻版當道；有人埋怨九十年代大量生產魚蛋K歌累事，有人更一口咬定，廣東歌不再好聽。
10.今時今日香港還有樂壇。沒有快歌，只有中慢板歌；沒有火熱動感，只有冰冷的傷感。唉好悶。沉悶的一切最需要你的美麗狂想，偏偏我們無力得連狂想都不能。
90年代，可能是我們最後的快樂時代。
撰文：月巴氏
facebook: https://www.facebook.com/fatmoonba
blog: http://fatmoonba.blogspot.com/
email: [email protected]