古語有云：要贏人，先要贏到自己。

說出以上一句(洋溢濃厚人生智慧)金句的人，是黎明。　

1.對於四大天王我的態度是：冇一個我超迷，但每一個都有啲嘢令我OK迷。立場，是有點騎牆。 2.像Leon。我的感覺是場夢。九十時代，無可避免地點都會睇過Leon的戲、聽過(兼識得唱)Leon的歌——而我承認，我仲買過Leon的碟。我係咪好任性吖。

3.回到九十年代初某一個上課天的小息時段。有堆女同學聚埋班房一角，臉露愁容，正在談論著甚麼……我八卦，走埋去聽——原來她們正在集體戥Leon慘——嚴格來說是戥Leon在《人在邊緣》個角色慘，因為前一晚劇情講到(有型又靚仔兼不羈反叛兼而有之的)他慘遭酷刑，打！藤！ 4.這是我如實經歷過的一個奇妙年代。女同學會為一個虛構角色的虛構遭遇而戥佢慘，甚或幾乎喊。看在眼裡，不明就裡。

5.更難明是後來連坐我隔籬的男同學也迷上Leon金曲《夏日傾情》——嚴格來說是迷上一個廣告。廣告中，一位少女因拗柴而未能去聽Leon演唱會，只能扁晒咀咁匿喺屋企……奇蹟出現了！佢個女仔friend好好心地，把電話交給Leon，Leon情深地說：「May～點吖～」一句情深說話，讓May開心到好似識得行！問題是，坐我隔籬個男同學究竟迷上呢個廣告的邊一Part？拗柴May？定Leon？佢唔肯講。 6.這是一個序幕。Leon跟某電訊商正式開展了一個在香港前所未有的廣告企劃：一年一歌一Ad，用MV說故事賣廣告，必備的，除了Leon的清深演出和深情金句，還有一個叫阿May的女仔。當中最勁應該是1994年《那有一天不想你》，飾演阿May的，是(當年迷倒不少男人男仔的)童愛玲。廣告(定係MV？)一開波，率先送上Leon一句「有緣嘅，我哋會再見」，and then音樂響起，抬頭望雨絲，夜風翻開信紙……1995年《一生最愛就是你》，成本更高玩埋爆破，問題是，首歌太想食《那有一天不想你》的剩餘價值；1996年《情深說話未曾講》改玩親情，「有時我都唔明，我哋之間，究竟隔咗張枱，定係隔咗幾個世代？」，Well，我覺得OK喎。

7.最離奇是《只要為我愛一天》。有當年好紅的楊采妮和被認為好靚仔的XXX(我唔想寫佢個名)，其實我唔太明箇中人物關係，只知高潮位是當Leon好型咁講咗句「要贏人，先要贏到自己」後，便一躍而下——玩笨豬Jump。呢個廣告(定MV？)的Concept實在太玄妙(定好笑？)，下一年《我這樣愛你》的情侶嗌交，小情小趣(即使Budget明顯好大)，反而更得我歡心，當Lee Ann因衰任性搞到二人被困雪山時，(明知故問地)問Leon：「我係咪好任性吖？」好一個Leon，置身冰天雪地依然處變不驚定過抬Oil，情深款款答道：「係，不過係我揀嘅。」問你 /妳死未？

8.以上每一首歌，都絕對是流行商品(而且真的流行喎)，由歌詞到MV，統統經過精密計算(咁當中也有高低之分)，因為作用就是Sell緊另一件商品，是廣告歌(每一首歌詞不同但主題相近)，Sell的純粹是Leon本人的有型&深情。或許塵世間真的有timing這回事，這些廣告這些歌，真的在那年代掀起勁大迴響，然後成為一個年代的反映(估不到今時今日有信用卡找來唯唯賣廣告，迴響仲驚人！)。

9.寫到這裡，不禁自問：Why曾幾何時的香港咁風光？Why今時今日咁坎呵？是我們在風光時太過老定不思進取？抑或可以把一切賴晒timing？ 10.勿灰心，因為Leon話俾我哋知：坎坷過後有艇搭！—Really？

月巴氏~90年代，可能是我們最後的快樂時代。

撰文：月巴氏 facebook: https://www.facebook.com/fatmoonba blog: http://fatmoonba.blogspot.com/ email: [email protected]