日劇《大叔的愛》以同性戀作主題。
方太是TVB粉絲，你不可能不知道。最新登場的《飛虎之潛行極戰》，她早用盒子觀看過。結論是戲種似《使徒行者》，演員陣容似《學警雄心》，戲服就當然似《飛虎》，難道會似《衝上雲霄》？全部見慣見熟，少少突破性新意也沒有。
我說：「唔通無綫拍一齣《大叔的愛》出來，你會喜歡咩？」她當然不明白《大叔的愛》是甚麼。《大叔的愛》是熱播中的日劇，故事講一個喜歡巨乳女孩的直男，突然被大叔型的男上司示愛，話口未完，又得到另一個美少年告白。以同性戀作為劇集主題，不算太罕有，香港電視台敢唔敢搵個大叔做主角先？
或者，你會話：「有冇搞錯呀，TVB齣齣劇都搵大叔做男主角喎。」係，我知，黎耀祥現年五十四，苗僑偉現年五十九，稱得上大叔有餘。無人理會實際年齡，個個只計較外觀年齡呢！以苗僑偉為例，型到一個地步，行出街，你話剛剛到四十都有人信，話佢快登六才被質疑。《大叔的愛》位大叔，唔係苗僑偉，比較接近劉丹。試想像，要你看劉丹跟男下屬談情說愛，而不是跟女兒或孫仔一齊食早餐耍太極，你確認你接受到？你接受到，也肯定有更多人接受不到，然後又話乜乜重口味，然後，劉丹又要《愛．回家》。
去年《不懂撒嬌的女人》，敢拍到劉丹跟年輕女演員真心相愛，現在想想，已經是一大突破。因為，在香港電視劇，爺孫戀從來得一個原因：個女人貪個男人的錢。直到最新的《逆緣》，即使個爺爺像姜大衛般有型，還是逃不出被嫩妻行騙的收場。唔係話唔反映現實，係拍得太多。就似拍完一次飛虎又拍飛虎，拍完一次臥底又拍臥底，拍完一次兄弟反目又拍兄弟反目，真係會疲勞的。我就希望能夠看到一齣港版《大叔的愛》：劉丹向袁偉豪示愛，打個茄輪，才解釋原來跟家燕姐結婚三十年只為滿足家人及社會的需求，終於等到社會風氣轉變了，覺得不可以終此一生也自欺欺人，決定要在全世界面前出櫃，坦承一生中最愛從來是劉江。一想到可以欣賞到劉丹與劉江兩位演技出色的前輩鬥戲，就急不及待想觀看。方太為人很開通，聽完我的建議，也覺得大有可為。不幸，做兒子的，立即照頭淋了一盆冷水：「算啦，在我有生之年，都不會見到這個畫面了。你看看無綫的重點製作，是倒模一次《溏心風暴》，或者倒模一次《宮心計》，便知道主理人就算明知重複又重複，成績會每下愈況，也根本不介懷。除非，有朝一日，似你一樣的電視觀眾，不再一路罵一路看，真係集體離棄電視劇，情願落樓下公園打野戰，或者改去咖啡店大模斯樣看龍虎豹囉。」我說完，自己也笑出來。
港版《大叔的愛》不妨找來劉丹出櫃。
