今個星期港股大跌，身邊幾個過去兩年在股票市場大有斬獲的朋友，稱短短兩日跌兩千點，大呼跌得好痛。聲稱唔見三分一身家的朋友A指，今次跌市跟以往不同，「之前外資掟貨，中資和國家隊會接貨穩住股市，但今次係中資外資一齊沽港股，所以恒指成交創3,600億的歷史紀錄，跌市加大成交，港股注定無運行。」朋友A又分析，今次跌市和中美兩國在天津的會談幾近拍枱離場、不歡而散有關，「一旦美國佬玩嘢，宣布美國的基金公司和401K的基金不准投資港股，香港呢個國際大賭場就會立即散檔。」朋友A續謂，全國人大常委會八月開會，消息還說可能把《反外國制裁法》納入香港《基本法》附件三，因此好多不穩定因素，資金要早走早著。
聽見朋友A分析得頭頭是道，筆者作為一個只懂跟人買iBond保值的蛋散，只能「哦哦哦」，搭不了嘴。同樣損手的朋友B卻沒有那麼悲觀，他反駁，如果完全無人接貨，就不會只跌兩千點，畢竟港股半年高位在三萬幾呀。至於美國禁止投資港股，朋友B更認為不可能，「而家全世界得中國經濟仲有增長，要買中國股票，基本上就要參與港股。制裁香港股市，等於制裁自己國家唔俾搵錢。而且，如果美國因為政治原因而杯葛港股，又好難想像拜登會唔俾買港股，但又可以去買滬深股市喎。」
至於《反外國制裁法》，朋友B最不擔心，他說其中一條條文是「任何組織和個人均不得執行或協助執行外國對中國公民、組織採取的歧視性限制措施。」換言之，引入反制裁法，有可能是為了那些被美國制裁的官員解困，令銀行可以恢復向他們提供服務。林鄭不再需要在禮賓府囤積現金，應該是最大贏家。