愛護地球，幫手減廢是大勢所趨。跑友都盡量減少使用樽裝水，而明日在西貢舉行的「新創建勇跑地貌王」有新招，率先於比賽沿途的水站試用1,000隻可再用水杯，亦不會向跑手提供紙杯，跑完後，所有參加者都必須在終點區用自攜水樽斟水。Ray要俾個Like佢。
提起樽裝水，好多時都會聯想到體育活動，其實不少體育賽事已開始減少甚至不會派發樽裝水。今次比賽主辦單位新創建集團，便與魏華星社會創投基金旗下以減少膠樽為使命的社企BottLess合作，希望為推動減少塑膠廢物，起帶頭作用。有環團曾指出香港平均每日棄置520萬個膠樽，足以填滿奧運標準泳池，情況都幾值得關注。原來仲唔止咁，佢地於明年1月1日「長洲元旦跑」，會贊助每位跑手一人一隻輕便隨身杯「Speed Cup」，跑手可以攞住跑，去到水站就用來斟水，希望用不同的方法試驗及推廣「綠色跑賽」的理念。