政務司司長張建宗(中)、馬會主席葉錫安(左)及行政總裁應家柏(右)一同於馬場獻藝。
出名「好做得」嘅政務司司長張建宗，早兩日完成大灣區考察，昨日又見到佢喺沙田馬場現身，出席一年一度的「香港賽馬會社群日」，期間仲興之所至「露兩手」，配合活動主題藝文共享，與馬會主席葉錫安及行政總裁應家柏一齊捧起夏威夷樂器Ukulele「Jam歌」。
除咗做得又彈得，張建宗仲有過目不忘嘅本領，期間佢就展示其功力，對馬會慈善信託基金的資助項目倒背如流，仲話自己雖然對賽馬認識不多亦鮮有觀賽，卻仍自認係馬會「粉絲」，讚馬會過去多年除了支持慈善團體，扶助弱勢社群外，仲大力支持本港文化藝術發展，幫手展現香港的軟實力。
活動上，馬會同時公布慈善信託基金喺啟發青年、長者安老，和普及體育之上，加入第4個慈善策略方向，就係藝術、文化及保育，除了硬件的建設，馬會亦會加強人才培育，拓展觀眾群，豐富市民的文化生活，以藝術回應社會問題，促進共融，亦會致力活化古蹟，傳承傳統文化。